Ապրիլյոթյան շնորհավորանքներ
Ապրիլի 7-ը Մայրության և գեղեցկության օրն է, գարնանային ամենանվիրական տոներից մեկը: Օրն ամփոփում է գեղեցիկ սեռի ներկայացուցիչներին նվիրված ոչ պաշտոնական միամսյակը: Տոնի առիթով ՀՊՏՀ լրատվության և հասարակայնության հետ կապերի բաժինը զրուցել է բուհի պրոֆեսորադասախոսական կազմի ներկայացուցիչների հետ, ովքեր յուրովի են արժևորել կնոջ դերն ու նշանակությունը մեր կյանքում, հղել բարեմաղթանքներ:
«Կինը կյանքի արարողն է, շարժիչ ուժը: Կինը վեհ արժեք է, որը պետք է մշտապես ուշադրության կենտրոնում լինի: Տոնական օրերին մենք առավել քան ուշադիր ենք դառնում կնոջ նկատմամբ, բայց պետք է այնպես անել, որ կնոջ հանդեպ ուշադրությունը երբեք չպակասի՝ ողջ կյանքի ընթացքում: Ապրիլի 7-ը գեղեցիկ առիթ է՝ կնոջ նկատմամբ հարգանքը, սերը ևս մեկ անգամ արտահայտելու համար: Մեր մայրերին, կանանց և քույրերին մաղթում եմ առողջություն ու երջանկություն»:
Մարքեթինգի ամբիոնի վարիչ Արարատ Զաքարյան
«Կինը ընտանիքի սյունն է, այն քնքուշ ու նուրբ էակը, որին պետք է միշտ հարգել ու սիրել: Ընտանիքի կինը մայր է, ով ունի մեծ առաքելություն՝ դաստիարակելու և կրթելու զավակներ, ովքեր դառնում են հասարակության բանական ու արժանավոր անդամներ: Կնոջ կերպարը զուգորդվում է բարության, նրբության, առաքինության ու գեղեցկության հետ: Մի խոսքով՝ կինը գեղեցիկի կրողն է: Մաղթում եմ, որ բոլոր կանայք առողջ ու երջանիկ լինեն, վայելեն մայրության բերկրանքը. շնորհավոր ձեր տոնը»:
Հաշվապահական հաշվառման և աուդիտի ֆակուլտետի դեկան Աշոտ Մաթևոսյան
«Կինն այն էակն է, ով մարդուն թևեր է տալիս, ոգեշնչում ապրելու: Կնոջ ամբողջական կերպարը մայրն է՝ ամենաբարի, ամենաներող ու քնքուշ էակը: Կինն արժանի է ուշադրության ու սիրուն: Նրա ամենամեծ արժանիքներից մեկն այն է, որ սերունդ է տալիս, զավակ պարգևում և դաստիարակում, ուստի ընտանիքում մեծ է նրա դերն ու նշանակությունը: Ընտանիքը ամուր է, եթե կինը խելամիտ է, նրբազգաց, բարի, հանդուրժող: Այս նվիրական տոնին մաղթում եմ, որ բոլոր կանայք սիրեն ու սիրված լինեն. շնորհավոր ապրիլի 7»:
Ֆիզդաստիարակության, ԱԻ և ՔՊ ամբիոնի վարիչի ժ/պ Սիմոն Հակոբյան
Մենք ևս միանում ենք բոլոր բարի մաղթանքներին: Շնորհավոր ապրիլի 7…
ՀՊՏՀ Լրատվության և հասարակայնության հետ կապերի բաժին