ՀՊՏՀ գիտական գրադարանը՝ Libway-2022 քառօրյա գիտաժողովի մասնակից

Սույն թվականի մարտի 14-18-ը տեղի է ունեցել Ռուսաստանի Դաշնության գիտությունների ակադեմիայի Սիբիրի մասնաճյուղի պետական ​​հանրային գիտատեխնիկական գրադարանի կողմից կազմակերպված «Գիտությունը, տեխնոլոգիաները և գիտական ինֆորմացիան գրադարաններում» թեմայով Libway-2022 քառօրյա գիտաժողովը, որին մասնակցում էր նաև ՀՊՏՀ գիտական գրադարանը: Այն անցավ հեռավար ձևաչափով, աշխատանքային լեզուներն էին անգլերենն ու ռուսերենը և նվիրված էր գիտական ​​հաղորդակցության, գիտության, գրքի մշակույթի, գրադարանային-տեղեկատվական գործունեության կազմակերպման ոլորտում արդիական հարցերին, փորձին և հետազոտական մեթոդներին: Գիտաժողովի հիմնական խնդիրներն ու թեմաները մի կողմից վերաբերում էին թվային մշակույթին գլոբալ անցմանը և դրա ազդեցությանը գիտական ​​հաղորդակցության համակարգի և գիտության կազմակերպման վրա, մյուս կողմից՝ գիտական ​​ժառանգությունը ձեռագիր և տպագիր ձևաչափով պահպանելու ուղիներին։

Գիտաժողովի ձևաչափը հետևյալն էր. այն բաժանված էր առանձին թեմաներով պանելային քննարկումների: Զեկուցումներով հանդես եկան Միխայիլ Աֆանասևը՝ Ռուսաստանի պետական ​​հանրային գրադարանի տնօրեն, Ռուսաստանի գրադարանային ասոցիացիայի նախագահ, Յակով Շրայբերը՝ Ռուսաստանի պետական ​​հանրային գիտատեխնիկական գրադարանի գիտական ​​ղեկավար, Սվետլանա Տարասովան՝ Նովոսիբիրսկի պետական ​​տարածաշրջանային գիտական ​​գրադարանի տնօրեն: