Ռուսաստանցի փորձագետների մասնակցությամբ դասախոսությունները շարունակվում են
Տնտեսագիտական համալսարանում շարունակվում են ռուսաստանցի փորձագետների մասնակցությամբ եռօրյա դասախոսությունները: Միջազգային ծրագրերի կենտրոնում այսօր կայացավ հերթական դասը՝ Մոսկվայի միջազգային հարաբերությունների պետական ինստիտուտի դասախոս, քաղաքագետ, «Արտաքին քաղաքականություն» պորտալի վերլուծաբան, քաղաքական գիտությունների թեկնածու Անդրեյ Սուշենցովի բանախոսությամբ: Դասախոսության թեման էր՝ «Ճգնաժամն Ուկրաինայում և Ռուսաստանի արտաքին քաղաքականությունը»:
Վարպետաց դասին մասնակցում էին «Ամբերդ» հետազոտական կենտրոնի աշխատակազմը՝ տնօրեն, տ.գ.դ., պրոֆեսոր Սամվել Ավետիսյանի գլխավորությամբ, երիտասարդ դասախոսներ, աշխատակիցներ, ուսանողներ, ասպիրանտներ:
![](https://asue.am/images/1519995871/67b645573dae3c9d563d537a.jpg)
Բանախոս Սուշենցովը նախ ներկայացրեց իր համալսարանի (վերոնշյալ) աշխատանքն ու գործունեությունը, ապա անդրադառնալով թեմային, նշեց, որ այն արդիական է և, հարկավ, շատերին է հետաքրքրում: Անդրադարձ եղավ ուկրաինական ճգնաժամի արմատներին, դրա բնորոշ գծերին, խոսվեց Ռուսաստանի արտաքին քաղաքականության հիմնական ուղղությունների ու առաջնահերթությունների մասին: Այս համատեքստում փորձագետը լուսապատկերի միջոցով ներկայացրեց ռազմական արտաքին և ներքին անվտանգությանն առնչվող խնդիրները, ռազմական վտանգներն ու սպառնալիքները և այլն:
![](https://asue.am/images/1519995871/ddda28b4c010745eea6e573c.jpg)
Դասախոսության ավարտից հետո բանախոսը պատասխանեց ուսանողների հարցերին, թեմայի շուրջ ծավալվեց քննարկում, տեղի ունեցավ բանավեճ:
Նշենք, որ ուսանողների կողմից մեծ ակտիվություն է նկատվում. դասախոսություններն ունկնդրելու են գալիս թե' բակալավրիատի ուսանողներ, թե' մագիստրանտներ:
Վաղը, ժամը 13.00-ին, եռօրյա վարպետաց դասերը կեզրափակվեն «Անդրկովկասն արդի աշխարհաքաղաքականության մեջ. հայացք Ռուսաստանից» թեմայով՝ Իգոր Նիկոլայչուկի բանախոսությամբ:
![](https://asue.am/images/1519995871/6532341871dd43aa24178970.jpg)
![](https://asue.am/images/1519995871/741231900f7fe7fe4ad5e787.jpg)
![](https://asue.am/images/1519995871/4bd4289568153f7aefbd8db0.jpg)
![](https://asue.am/images/1519995871/06175f9dcd793426b7bb7d76.jpg)
![](https://asue.am/images/1519995871/394dbb29fce138555b3ba0ba.jpg)
![](https://asue.am/images/1519995871/c784ddfd077beece491564a7.jpg)
ՀՊՏՀ Լրատվության և հասարակայնության հետ կապերի բաժին
Նախորդ նորություններն` այստեղ