ՀՊՏՀ-ում մեկնարկում է նոր դասընթաց՝ գնումների գործընթացի կազմակերպման մասնագետների համար

13.01.2021
Դիտումների քանակ՝ 2855

Փետրվարի 8-ին ՀՊՏՀ շարունակական կրթության և վերապատրաստումների բաժնի կողմից կմեկնարկի նոր դասընթաց՝ «Հանրային գնումների համակարգը ՀՀ–ում» խորագրով։

Ծրագրի անվանումը՝ «Հանրային գնումների համակարգը ՀՀ–ում» (Գնումների գործընթացի կազմակերպման մասնագետների դասընթաց)։

Դասընթացի նկարագիրը՝

Հանրային գնումների (ՀԳ) կայուն համակարգի ձևավորումը և զարգացումը բոլոր ժամանակների, պետությունների, պետական և տեղական իշխանությունների համար տնտեսական կայունության ապահովման, համախմբված բյուջեի կապիտալ ծախսերի բաշխման և վերաբաշխման գործընթացի արդյունավետության ապահովման գրավականներից է։

Հանրային գնումների համակարգը (ՀԳՀ) սերտորեն կապված է հանրային ֆինանսական համակարգի և հանրային ներդրումային հոսքերի հետ և նպաստում է հանրային միջոցների արդյունավետ և նպատակային օգտագործմանը՝ ապահովելով ապրանքների, աշխատանքների և ծառայությունների ձեռքբերում` համարժեք հատուցմամբ, ՀԳՀ-ի նպատակներից մեկը գնումների և գնումների գործընթացի տնտեսող, արդյունավետ և օգտավետ իրականացումն է։

Դասընթացը մասնակիցներին հնարավորություն կտա լիարժեք տեսական և գործնական գիտելիքներ ստանալ պետական և համայնքային (հանրային) գնումների համակարգերի իրավական գործնական կիրառելիության առանձնահատկությունների ամբողջ գործընթացի վերաբերյալ։

Հայաստանի Հանրապետությունում պետությունը և համայնքը հաստատակամորեն մնում են ապրանքների, ծառայությունների և աշխատանքների ամենախոշոր պատվիրատուները՝ հավաքագրելով հանրային կարիքների բավարարման համար համապատասխան եկամուտներ (բյուջեի կապիտալ ծախսեր)։

Այդ պատճառով էական նշանակություն ունի և կարևորվում է հանրային գնումների այնպիսի համակարգի և օրենսդրության մշակումը և կիրառումը, որը մի կողմից՝ կնվազեցնի այդ ոլորտի ռիսկերը, իսկ մյուս կողմից՝ չի խոչընդոտի տնտեսական հավասար, թափանցիկ, ոչ խտրական մրցակցությանը և երկկողմ կարողությունների ձևավորմանը։

Դասընթացի ընթացքում ստացած գիտելիքները, մասնագիտական հմտությունների ձեռքբերման և ամրապնդման, գործնական օրինակների քննարկումը և գնման ձևերի փորձարկումը հիմք կստեղծեն արդյունավետ կերպով կիրառել հանրային գնումների համակարգի հմտությունները պետական կառավարման և տեղական ինքնակառավարման մարմինների գործունեության տարբեր մակադակներում, տարբեր ոլորտներում, ինչպես նաև մասնավոր հատվածում։

Դասախոսությունները վարում է ՀՀ էկոնոմիկայի նախարարության «Հանրային ներդրումների քաղաքականության» վարչության պետ, «Պետական գնումների փորձագետների միություն» ՀԿ–ի նախագահ, միջազգային և պետական գնումներում 11 տարվա փորձ և որակավորում ունեցող փորձագետ, տնտեսագիտության թեկնածու Գայանե Գաբրիելյանը:

Դասընթացի մանրամասները՝

Դասընթացի ավարտին մասնակիցները՝

  • Կուսումնասիրեն հանրային գնումների պլանավորման փուլը,
  • Ձեռք կբերեն գնումների պլանի և դրանում փոփոխությունների և լրացումներ իրականացնելու բավարար հմտություններ,
  • Կկարողանան կազմել և գնահատել գնումների կազմակերպման փուլում մշակվող և հաստատվող գնման հայտեր,
  • Կծանոթանան մրցույթ իրականացնելու համար անհրաժեշտ օրինակելի ձևերին, ինչպես նաև մասնակիցներին կտրամադրվեն հրապարակված օրինակելի ձևերի բացակայող փաթեթը,
  • Կուսումնասիրեն գնումների պայմանագրի կնքման փուլը,
  • Կտիրապետեն գնումների պայմանագրի կազմման և դրանում լրացումներ և փոփոխություններ իրականացնելու համար անհրաժեշտ գիտելիքներ,
  • Կծանոթանան գնումների ներկայիս օրենսդրական համակարգին և դրանում նախատեսվող փոփոխություններին,
  • Կկարողանան մշակել ապրանքների, ծառայությունների և աշխատանքների «Գնումների մասին» ՀՀ օրենքին համապատասխան ապրանքների, աշխատանքների և ծառայությունների տեխնիկական բնութագրեր։

Դասընթացը նախատեսված է՝

  • Հանրային հատվածի մասնագետների,
  • Գնումների որակավորում ստանալ ցանկացողների,
  • Գնումների համակարգողների,
  • Բակալավրի ավարտական կուրսերի ուսանողների, մագիստրոսների, ասպիրանտների համար,
  • Մասնավոր հատվածի կազմակերպությունների,
  • Բոլոր նրանց, ովքեր ունեն հանրային գնումներին առնչվող պարտականություններ կամ ցանկանում են մասնակել մրցութային գործընթնացների։

Դասընթացի արժեքը՝ 46 000 ՀՀ դրամ։

Դասընթացի տևողությունը՝ 18 ժամ, 9 հանդիպում, երկուշաբթի և չորեքշաբթի, ժամը 18։30-ին։

Դասընթացի ավարտին թեստավորման 80% շեմը հաղթահարած մասնակիցներին կշնորհվեն ավարտական հավաստագրեր։

Գրանցվելու համար այցելեք այստեղ։

Ավելացնենք նաև, որ ՀՊՏՀ աշխատակիցները և ուսանողները դասընթացին մասնակցում են 30%, շրջանավարտները՝ 10% զեղչով։