ՀՊՏՀ ուսանողների զեկուցումը միջբուհական կոնֆերանսում «Լավագույն աշխատանք» է ճանաչվել
Նոյեմբերի 14-15-ը Ծաղկաձորում կայացել է «BEEngineer» խորագիրը կրող միջբուհական ուսանողական գիտական կոնֆերանսը, որտեղ ՀՊՏՀ ուսանողներ, հաշվապահական հաշվառման և աուդիտի ֆակուլտետի 3-րդ կուրսի ուսանող Դավիթ Պետրոսյանի և կառավարման ֆակուլտետի 2-րդ կուրսի ուսանող Զավեն Խուկեյանի հեղինակած «Կրթությունը որպես ՀՀ տնտեսության զարգացման գրավական» թեմայով զեկուցումը ճանաչվել է «Լավագույն աշխատանք»: Նշենք, որ կոնֆերանսը կազմակերպվել է ՀՊՃՀ ուսանողական գիտական ընկերության կողմից՝ նվիրված Ճարտարագիտական համալսարանի ուսանողական խորհրդի 20-ամյակին:
ՀՊՏՀ լրատվության և հասարակայնության հետ կապերի բաժինը զրուցեց Դավիթ Պետրոսյանի և Զավեն Խուկեյանի հետ, ովքեր ընդգծեցին նման միջոցառումների անհրաժեշտությունը՝ նշելով, որ դրանք նպաստում են տեսական գիտելիքները գործնականացնելուն, խթանում են միջբուհական շփումները: Հավելենք, որ տղաները ակտիվ ուսխորհրդականներ են: Թեմայի ընտրությունը Զավեն Խուկեյանը մեկնաբանեց այսպես. «Որպես ուսանողությանը մոտ գտնվող անձինք՝ մենք պատկերացնում ենք ուսանողների խնդիրները՝ կապված ուսումնառության հետ և փորձել ենք մեր զեկույցում առաջարկել դրանց լուծման ուղիները: Ուշադրություն ենք դարձրել կրթության որակի բարձրացման խնդրին, ցույց ենք տվել տնտեսության և կրթության սերտ կապը: Բարձրորակ կրթությունը մեծապես նպաստում է տնտեսության զարգացմանը»:
Դավիթ Պետրոսյանը նշեց, որ կրթության որակի բարելավման հարցում պետության դերը շատ մեծ է: « Պետությունը պետք է աշխատաշուկայում ստեղծի առողջ մրցակցություն, ուսանողներն էլ իրենց հերթին շահագրգռված լինեն որակյալ մասնագետ դառնալու և իրենց արժանի տեղը գտնելու հարցում»:
Որպես ուսանողությանը ամենաշատը հուզող խնդիր՝ տղաները մատնանշեցին դասախոսությունների նոր որակի անհրաժեշտությունը, այսինքն՝ դասախոսները պետք է նոր մեթոդներ կիրառեն դասախոսությունը մատուցելիս:
Հեղինակների փոխանցմամբ՝ զեկույցում օգտագործվել են IPSC վերլուծական կայքի վիճակագրական տվյալներ` հիմնված ուսանողական հարցումների վրա:
Շնորհավորում ենք մեր ուսանողներին, մաղթում նոր ձեռքբերումներ:
Հ.Գ. Լուսանկարները տրամադրել է Զավեն Խուկեյանը:
ՀՊՏՀ Լրատվության և հասարակայնության հետ կապերի բաժին