Պատմվածքի մրցույթը շարունակվում է

Սիրելի ուսանողներ, հարգելի գործընկերներ, ինչպես ավելի վաղ հայտնել ենք, ձեր ուշադրությանն ենք ներկայացնում  աննախադեպ նախագիծ: Նախագծի մասին հայտարարել ենք անցած շաբաթ, բայց տեղին ենք համարում ևս մեկ անգամ ներկայացնել այն, որպեսզի ավելի լայն զանգվածներ տեղեկանան։

 ՀՊՏՀ լրատվության և հասարակայնության հետ կապերի բաժինը Ֆիզդաստիարակության, արտակարգ իրավիճակների և քաղպաշտպանության ամբիոնի  վարիչի ժամանակավոր պաշտոնակատար,  պրոֆեսոր Սիմոն Հակոբյանի առաջարկությամբ և նրա հետ համատեղ նախաձեռնում է պատմվածքի մրցույթ: 

Մրցույթի նպատակն է խթանել ուսանողության շրջանում ընթերցասիրությունը , Հայաստանի պետական տնտեսագիտական համալսարանի շրջանակներում բացահայտել ստեղծագործական անհատականություններին, ներկայացնել ու խրախուսել նրանց, ինչպես նաև ընդարձակել «Տնտեսագետի» ընթերցողների և հեղինակների շրջանակը:

Նախագիծն իրականացվում է ՀՊՏՀ ռեկտոր Կորյուն Աթոյանի աջակցությամբ։

 Հայտարարության տեքստը սիրով ներկայացնում ենք ձեր ուշադրությանը:

 Պատմվածքի մրցույթի պայմաններն են՝

1. Թեմայի ազատ ընտրություն:
2. Ծավալը. բառերը չպետք է գերազանցեն 2500 նիշը` բացատներն ու կետադրական նշանները ներառյալ (մոտավորապես 5 էջ, տողամիջյան  հեռավորությունը՝ 1, տառատեսակը՝ sylfean, տառաչափը՝ 12)։
3. Ներկայացված նյութը պետք է լինի ընթեռնելի, զերծ` տեխնիկական թերություններից և գրագետ շարադրված:
4. Մրցույթին կարող են մասնակցել ՀՊՏՀ-ի (իհարկե, նաև մասնաճյուղերի) առկա և հեռակա ուսուցման համակարգերում սովորող ուսանողները, դասախոսները, վարչական անձնակազմի անդամները, աշխատակիցները:
5. Ներկայացվող պատմվածքը չպետք է տպագրված կամ որևէ մրցույթի ներկայացված լինի նախկինում:
6. Յուրաքանչյուր հեղինակ կարող է ներկայացնել միայն մեկ ստեղծագործություն:

1. Ստեղծագործության վերջում նշել հետադարձ կապի տվյալները` հետախոսահամարներ, էլեկտրոնային հասցե:

Պատմվածքները կարելի է ներկայացնել ինչպես ՀՊՏՀ լրատվության և հասարակայնության հետ կապերի բաժին, այնպես էլ ուղարկել news@asue.am  anieavet@gmail.com էլեկտրոնային հասցեներին` մինչև 2013 թվականի մարտի 1-ը:

Նախապես ցանկանում ենք նշել, որ մասնակցության հայտ ներկայացնողները պետք է հանդես գան ծածկանուններով (կեղծանուններով): Մրցույթը համակարգող խումբն այս որոշումն ընդունել է` առավելագույն անաչառություն ապահովելու համար:

Մրցանակային տեղեր գրաված հեղինակները կարժանանան դրամական մրցանակների (1-ին տեղ` 80. 000 դրամ, 2-րդ տեղ` 65. 00 դրամ, 3-րդ տեղ` 50. 000 դրամ) և հավաստագրերի:

Հաղթողներին կորոշի մրցատյանը` հաշվի առնելով նաև ՀՊՏՀ ֆեյսբուքյան պաշտոնական էջում պատմվածքների վերաբերյալ ընթերցողների արձագանքները (like–երը)։ Պատմվածքները հրապարակվելու են ՀՊՏՀ պաշտոնական կայքում (asue.am), ինչպես նաև բուհի ֆեյսբուքյան էջում:

Մրցույթի արդյունքները կամփոփվեն 2013 թվականի մայիսի սկզբին:

Պատմվածքներին  ծանոթանալու   համար այցելեք ՀՊՏՀ պաշտոնական կայքի (asue.am) «Մեդիա» բաժնի «Պատմվածքի մրցույթ» ենթաբաժին  (http://www.asue.am/am/մեդիա/պատմվածքի-մրցույթ-299):

Ներկայացված լավագույն պատմվածքները կտպագրվեն  «Տնտեսագետ» ամսագրում: