ՀՊՏՀ-ն մասնակցել է կարիերայի և ձեռնարկատիրության տոնավաճառին. տնտեսագիտական կրթության նկատմամբ հետաքրքրությունը մեծ է

Ձեռներեցության համաշխարհային շաբաթվա միջոցառումների շրջանակում, ԱՄՆ դեսպանատան աջակցությամբ,  «Արմենիա Մարիոթ» հյուրանոցում նոյեմբերի 17-ին  տեղի է ունեցել կարիերայի և ձեռնարկատիրության տոնավաճառ, որին ՀՊՏՀ-ն ներկայացրել է համալսարանի շարունակական կրթության և կարիերայի բաժինը: Միջոցառումը նպատակ է ունեցել մեկտեղելու  կրթություն, շարունակական ուսուցում  և զարգացում, ինչպես նաև զբաղվածություն ապահովող կառույցներին՝ անձի մասնագիտական կողմնորոշման, կարիերայի պլանավորման և զարգացման հնարավորությունների մասին տրամադրելով անհրաժեշտ տեղեկություններ:

ՀՊՏՀ տաղավարը ներկայացրել են վերոնշյալ բաժնի ղեկավար Աիդա Առուստամյանը, առաջատար մասնագետ Լիդա Դիլբարյանը և դիզայներ Հռիփսիմե Մելիքյանը:

«Նմանատիպ տոնավաճառները միտված են խրախուսելու երիտասարդներին՝ գտնելու կարիերային անհրաժեշտ կրթական և աշխատանքային հնարավորություններ, ինչպես նաև հանդիպման առիթ են աշխատանք փնտրողների և աշխատանք առաջարկողների համար»,-մեզ հետ զրույցում ասաց Աիդա Առուստամյանը:

Ինչպես պատմում են մեր մասնակիցները՝ ՀՊՏՀ-ն ներկայացնող տաղավարը հայաստանյան մյուս բուհերի կողքին բավականին մարդաշատ է եղել և օրվա երկրորդ կեսին արդեն ներկայացվող նյութերի պակաս է զգացվել: Շատ են եղել տնտեսագիտական կրթությամբ հետաքրքրվող երիտասարդները, ովքեր հիմնականում միջազգային կրթական ծրագրերին վերաբերող հարցեր են հղել, իսկ ավագ դպրոցի սաներին հետաքրքրել է  ՀՊՏՀ ֆինանսատնտեսագիտական քոլեջ ընդունվելու պայմանները:

Ուշագրավ է, որ տոնավաճառի ընթացքում մի քանի մանկավարժներ հարցրել են՝ արդյոք  ՀՊՏՀ տաղավարում առկա է ձեռնարկատիրության վերաբերյալ աշակերտների համար մատչելի որևէ գիրք: Մասնագիտական կողմնորոշման և շարունակական կրթության վերաբերյալ Տնտեսագիտական համալսարանի կողմից առաջարկվող դասընթացները ևս այցելուների հետաքրքրության կենտրոնում են եղել:

Միջոցառման շրջանակում անցկացվել են քննարկումներ, սեմինարներ և վարպետաց դասեր:

Առաջարկում ենք դիտել նաև միջոցառման մասին Հանրային հեռուստաընկերության անդրադարձը հետևյալ հղումով՝ www.youtube.com/watch?v=Q7AwxtLsctg&feature=player_embedded:

Լուսանկարները՝ ՀՊՏՀ շարունակական կրթության և կարիերայի բաժնից:

ՀՊՏՀ Լրատվության և հասարակայնության հետ կապերի բաժին