«Հայաստանի ռազմավարական զարգացման կենտրոնի» հետ կնքվեց հեռանկարային համագործակցության հուշագիր
Երեկ Հայաստանի պետական տնտեսագիտական համալսարանում էին «Հայաստանի ռազմավարական զարգացման կենտրոն» հիմնադրամի (ՀՌԶԿ) տնօրեն Կարեն Ավագյանը, տնօրենի օգնական Դիանա Արմաղանյանը և հիմնադրամի իրավաբան-վերլուծաբան Լենա Անտոնյանը։
Տնտեսագիտական համալսարանի հետ ՀՌԶԿ-ն մտադիր է փոխգործակցության երկարաժամկետ հեռանկարներ նախանշել, մասնավորապես՝ օգտագործել բուհի գիտական ներուժը՝ որպես փորձագետներ և խորհրդատուներ ներգրավելով հիմնադրամի աշխատանքային խմբերում։
Ողջունելով համագործակցության մեկնարկը՝ ՀՊՏՀ ռեկտոր Դիանա Գալոյանն ասաց, որ Տնտեսագիտական համալսարանը, հանդիսանալով Հայաստանում միակ տնտեսագիտական բուհը, արդյունավետ համագործակցում է ՀՀ էկոնոմիկայի նախարարության և նրան կից կառույցների հետ, որոնք ոչ միայն գործընկեր, այլ նաև գործատու են բուհի համար։
«Լինելով պետական բուհ՝ մեր մեծ ցանկությունն է դերակատար լինել պետության կյանքում և նշանակալի արդյունավետություն ապահովել։ Հուսով եմ՝ համաձայնագիրը թղթի վրա չի մնա, և մենք կկարողանանք հետազոտական այնպիսի հենք ստեղծել, որով օգտակար կլինենք Հայաստանի Հանրապետությանը»,- ընդգծեց Դիանա Գալոյանը։
Շնորհակալություն հայտնելով գործընկերության համար՝ ՀՌԶԿ տնօրեն Կարեն Ավագյանը ՀՊՏՀ ռեկտորին ներկայացրեց փոխգործակցության հեռանկարների վերաբերյալ հիմնադրամի պատկերացումները՝ հավաստելով, որ ՀՊՏՀ-ի և հիմնադրամի համագործակցությունը զարգացման տեսանելի հեռանկարներ ունի։
«Առավել քան վստահ եմ, որ այն ճանապարհը, որ անցնելու ենք միասին, արդյունավետ կլինի թե՛ փորձի փոխանակման և թե՛ գործնական կիրառության առումով»,- ընդգծեց Կարեն Ավագյանը։
Հանդիպումը նշանավորվեց հուշագրի ստորագրմամբ, որի ավարտին կողմերը պայմանավորվեցին քննարկել և մշակել համագործակցության արդյունավետ այլ ձևաչափեր ևս։