Տոնում ենք Հայաստանի անկախության 24-ամյակը
Համայն հայությունն այսօր տոնում է Հայաստանի երրորդ Հանրապետության անկախության օրը: Անկախ Հայաստանի Հանրապետությունը 24 տարեկան է:
1990թ. Անկախության հռչակագրից հետո, ՀՀ Գերագույն խորհրդի որոշմամբ, Հայաստանի տարածքում անցկացվեց հանրաքվե: 1991թ. սեպտեմբերի 21-ին հայ ժողովուրդը հանրաքվեում իր վստահ «այո»-ն ասելով` միասնաբար ընտրեց անկախության ճանապարհը: Սեպտեմբերի 23-ին ՀՀ Գերագույն խորհուրդը, ամփոփելով հանրաքվեի արդյունքները, Հայաստանի Հանրապետությունը հռչակեց անկախ պետություն: Մեր ժողովրդի պատմությունն այսպիսով թևակոխեց նոր ժամանակաշրջան:
Սեպտեմբերի 21-ը ամեն հայի հոգում ու մտքում ամրագրված է իբրև մի գեղեցիկ տոն, որը վերստին արժևորում է անկախության գաղափարը, մեզ համակում հայրենիքն անմնացորդ սիրելու, շենացնելու, պահպանելու եռանդով:
Թո′ղ անկախ Հայաստանի բոլոր առավոտները խաղաղ բացվեն, թո′ղ հայրենիքի կապույտ երկնի տակ հավերժ փողփողա հայոց եռագույնը, ապրի, զորանա ստեղծագործ հայը:
Հա′յ ժողովուրդ, շնորհավոր Անկախության տոնդ:
ՀՊՏՀ Լրատվության և հասարակայնության հետ կապերի բաժին