Ֆինանսատնտեսագիտական քոլեջի ուսանողները հյուրընկալվեցին ՀՊՏՀ-ում
Հայաստանի պետական տնտեսագիտական համալսարանի ու ավագ և միջնակարգ դպրոցների և քոլեջների հետ համագործակցության ծրագրի շրջանակներում այսօր մեր բուհում հյուրընկալվեցին Երևանի պետական ֆինանսատնտեսագիտական քոլեջի ուսանողները և դասախոսներ Նուրիսա Բեժանյանն ու Ծաղիկ Գրիգորյանը: ՀՊՏՀ զոհված ազատամարտիկների անվան լսարանում բուհի ուսանողական խորհրդի ուսումնագիտական հանձնաժողովի նախագահ, կառավարման ֆակուլտետի 3-րդ կուրսի ուսանողուհի Անի Կարապետյանը հյուրերին ներկայացրեց ուսխորհրդի գործունեությունը, կառուցվածքը և այլն, ապա խոսեց ֆակուլտետների, մասնագիտությունների, ուսումնառության գործընթացին առնչվող հարցերի մասին:
Դպրոցների, քոլեջների հետ համալսարանի համագործակցությունը համակարգող Լուսինե Կարագուլյանը լրատվության և հասարակայնության հետ կապերի բաժնի հետ զրույցում նշեց, որ փոխգործակցության շրջանակներում ՀՊՏՀ ներկայացուցիչները նոյեմբերի 8-ին հյուրընկալվել էին Պռոշյանի միջնակարգ դպրոցում, աշակերտներին ներկայացրել են մեր բուհը, կրթական ծրագրերը և բուհի մասին այլ տեղեկություններ:
«Առաջիկայում նախատեսում ենք մեր բուհում դասախոսություն՝ աշակերտների և քոլեջի ուսանողների համար»,-հավելեց Լուսինե Կարագուլյանը:
ՀՊՏՀ լրատվության բաժինը զրուցեց քոլեջի ուսանողների հետ, ովքեր կարևորեցին նմանատիպ այցելությունները: «Այս հանդիպումների միջոցով ես ձեռք եմ բերում տեղեկություններ ՀՊՏՀ-ի մասին և ցանկանում եմ կրթությունս շարունակել հենց այս բուհում»,-ասաց ֆինանսատնտեսագիտական քոլեջի ուսանողուհի Տաթև Նազարյանը:
Հանդիպման ավարտին քոլեջի ուսանողները շրջայց կատարեցին ՀՊՏՀ բակով, ֆակուլտետներով, մասնաշենքերով: ՀՊՏՀ ապագա ուսանողները բավականին տպավորված էին:
ՀՊՏՀ Լրատվության և հասարակայնության հետ կապերի բաժին