Մրցույթ «Էրազմուս+» ծրագրին մասնակցած ուսանողների համար

ՀՊՏՀ միջազգային կապերի բաժինը հայտարարում է մրցույթ բոլոր այն ուսանողների համար, որոնք եղել են ՀՊՏՀ «Էրազմուս+» ծրագրի մասնակիցներ և սովորել են ՀՊՏՀ-ի հետ համագործակցող որևէ համալսարանում։

«Էրազմուս+» ծրագիրը նպաստում է անհատական և գործնական հմտությունների ու կարողությունների զարգացմանը, սկիզբ է դնում հաջողակ կարիերային, խթանում է նորարար մտածողության ձևավորումը և հանդիսանում է ոգեշնչման աղբյուր։

Ովքե՞ր կարող են դիմել։

Ծրագրին մասնակցած բոլոր ՀՊՏՀ ուսանողները կարող են դիմել մրցույթին։ Մրցույթը բաղկացած է երկու անվանակարգերից՝ «Լավագույն տեսանյութ» և «Լավագույն հաջողության պատմություն»։

Ինչպե՞ս մասնակցել մրցույթին։

Մրցույթին կարող եք մասնակցել՝ int.mobility@asue.am էլհասցեին ուղարկելով ձեր հաջողության պատմությունը կամ տեսանյութը։

Նամակի վերնագիր (subject) հատվածում անպայման պետք է նշել «Once Erasmus, Always Erasmus», անուն-ազգանուն (լատինատառ), (եթե դիմում եք թիմով՝ թիմի բոլոր մասնակիցների անուն-ազգանունները․ լատինատառ):

Նամակին կից ուղարկե՛ք 3 լուսանկար․ երկուսը՝ ձեր էրազմուսյան նկարներից, մեկը՝ պաշտոնական լուսանկար։

Նամակում նշե՛ք․

• անուն, ազգանուն,
• ուստարի, երբ մասնակցել եք «Էրազմուս+» ծրագրին,
• ընդունող համալսարանի անվանումը։

Որո՞նք են դիմելու պայմանները․

• կարող եք մասնակցել մեկ անվանակարգին (օրինակ՝ միայն «Լավագույն տեսանյութ» անվանակարգին ) կամ երկուսին միաժամանակ,
• մրցույթին կարող եք մասնակցել ինչպես անհատապես, այնպես էլ թիմային,
• հաջողության պատմությունը պետք է լինի յուրահատուկ (ստուգվելու է գրագողության հատուկ ծրագրով), մոտ 300-400 բառի սահմաններում, և՛ անգլերենով, և՛ հայերենով, PDF ձևաչափով,
• տեսանյութը պետք է լինի առավելագույնը 3 րոպե, նվազագույնը՝ 1 րոպե տևողության (առանց բումերանգների օգտագործման),
• և՛ տեսանյութը, և՛ հաջողության պատմությունը պետք է ունենան ուսուցողական հատված (մասնավորապես՝ ձեր կրթական ծրագրի և ձեռքբերված փորձառության մասին), նկարագրեն ձեր անցած ուղին։

Մրցույթի վերջնաժամկետը՝ հոկտեմբերի 3

Մրցույթի արդյունքները կամփոփվեն «Տեղեկատվական օր» միջոցառմանը, որի մասին մանրամասները շուտով կհայտարարվեն։

Հարցերի դեպքում կարող եք գրել բաժնի int.mobility@asue.am էլհասցեին:

Հաջողություն ենք մաղթում: Եղե՛ք ստեղծագործ, և թող հաղթի լավագույն պատմությունը: