Հնգօրյա վերապատրաստման ծրագրի մասնակցելու հրավեր

Թրակիայի Դեմոկրիտուս համալսարանի (Հունաստան) «Էրազմուս+» գրասենյակը կազմակերպում է «Թրակիայի Դեմոկրիտուս համալսարանի առաջին միջազգային շաբաթ» հնգօրյա վերապատրաստման ծրագիրը, որը կանցկացվի առցանց՝ մայիսի 24-28-ը։ Միջազգային շաբաթը բաց է համալսարանի բոլոր գործընկերների, և՛ ակադեմիական, և՛ վարչական աշխատակիցների համար: Աշխատակիցների մասնակցությունն անվճար է։

Մասնակիցները կծանոթանան Թրակիայի Դեմոկրիտուս համալսարանին, հնարավորություն կունենան ներկայացնելու իրենց բուհը, գաղափարներ և լավագույն փորձը՝ միաժամանակ իրականացնելով դասընթացներ տարբեր ոլորտներում, ինչպիսիք են՝

• «Էրազմուս+» ծրագրի 2021-2027 թթ. նոր առանձնահատկությունները և մարտահրավերները,
• եվրոպական ERASMUS + KA2 նախագծերի կազմակերպում և կառավարում,
• Covid-19-ի մարտահրավերները և կրթության ոլորտում անցում թվայնացման,
• նոր թվային գործիքներ և բաց մանկավարժություն բարձրագույն կրթության ոլորտում,
• բարձրագույն կրթության ներառական ուսումնական պլաններ,
• ժամանակի կառավարում, մոտիվացիա:

Ակադեմիական և վարչական անձնակազմը առաջին երեք օրվա ընթացքում կներկայացնի ընդհանուր ծրագիրը: Մայիսի 27-ին և 28-ին ակադեմիական և վարչական անձնակազմերը տարաբնույթ գործունեություն կծավալեն. ակադեմիական անձնակազմի համար շեշտը դրվելու է բուհերի մանկավարժական և ուսումնական ծրագրերի ձևավորման հմտությունների վրա:

Մայիսի 25-ին և 26-ին տեղի կունենան համատեղ նստաշրջաններ Պիրեյոսի համալսարանի հետ, որը հնարավորություն կտա ընդլայնելու համագործակցությունը համալսարանների միջև, ինչպես նաև ստեղծելու նոր գաղափարներ:

Հայտերի ընդունման վերջնաժամկետն է մայիսի 14-ը:

Բոլոր գործողություններում որակը և արդյունավետությունն ապահովելու համար մասնակիցների առավելագույն թիվը 80-ն է:

Թրակիայի Դեմոկրիտուս համալսարանը մասնակիցներին ընտրելու համար հաշվի կառնի հետևյալ հանգամանքները.

• աշխարհագրական հաշվեկշիռ,
• վարչական անձնակազմի և ակադեմիական ներկայացուցիչների համամասնություն:

Բոլոր դիմորդներն իրենց մասնակցության վերաբերյալ հաստատող նամակներ կստանան մինչև մայիսի 17-ը:

Վկայական կտրվի այն մասնակիցներին, որոնք ներկա են եղել միջոցառման հինգ օրերից առնվազն չորսին:

Հայտադիմումը կարող եք լրացնել այստեղ։

Նախնական ծրագրին կարող եք ծանոթանալ այստեղ:

Տեղեկատվությունը՝ ՀՊՏՀ միջազգային կապերի բաժնից