ՀՊՏՀ պրոֆեսորը՝ Վիեննայում կայացած գիտաժողովի և ՀՄԴ տարեկան ժողովի մասնակից
2023 թ․ նոյեմբերի 14-ից 16-ը Համաշխարհային բանկի ֆինանսական հաշվետվողականության բարեփոխումների կենտրոնը Վիեննայում (Ավստրիա) կազմակերպել էր եռօրյա գիտաժողով, որին մասնակցել է նաև ՀՊՏՀ ֆինանսական հաշվառման ամբիոնի վարիչ, տ․գ․դ․, պրոֆեսոր Հայկ Մնացականյանը։
Գիտաժողովին հյուրընկալվել էին հաշվապահական հաշվառման հանրային և մասնավոր հատվածի, մասնագիտական և ակադեմիական համայնքների բարձր մակարդակի ներկայացուցիչներ, ինչպես նաև փորձագետներ՝ ԵՄ և միջազգային այլ հաստատություններից։
Գիտաժողովին ակտիվ մասնակցություն են ցուցաբերել նաև Հայաստանի աուդիտորների և փորձագետ հաշվապահների պալատի, ՀՀ ֆինանսների նախարարության, Հաշվապահական հաշվառման և աուդիտորական գործունեության հանրային վերահսկողության խորհրդի պատվիրակությունները։ Գիտաժողովը ուղղված էր Արևմտյան բալկանների և ԵՄ Արևելյան գործընկերության երկրներին՝ աջակցելու պետական հատվածի հաշվապահական հաշվառման և ֆինանսական հաշվետվությունների շրջանակների զարգացմանը:
Գիտաժողովի ընթացքում քննարկվել են այնպիսի հարցեր ինչպիսիք են`
- Ֆինանսների կառավարման ինֆորմացիոն միջազգային համակարգի իրականացումը՝ բյուջեի, ֆինանսական հաշվետվությունների և հարկաբյուջետային վիճակագրության միջև ինտեգրումը։
- Տարբեր հաշվետվական հիմունքներով պատրաստված ֆինանսական հաշվետվությունների համախմբումը՝ ներառյալ տեղական ինքնակառավարման մարմինների և պետական սեփականություն հանդիսացող ձեռնարկությունների:
- Կայունության հաշվետվությունների ներկայացումը, դրանց կապը ֆինանսական հաշվետվությունների պատրաստման գործնական ասպեկտների և ուսուցման հետ:
Նույն ժամանակաշրջանում Հայկ Մնացականյանը մասնակցել է նաև Հաշվապահների միջազգային դաշնության տարեկան ժողովին։
Անդրադառնալով Վիեննա կատարած իր այցին՝ պրոֆեսորն ընդգծում է, որ միջազգային գիտաժողովին և փորձագետների հետ հանդիպումների ընթացքում ձեռք բերված գիտելիքները և փորձը օգտակար են ՀՊՏՀ ռազմավարության իրականացման, առաջադիմական գիտելիքի արդյունավետ ներդրման ու կիրառման գործում։