Էրազմուսյան այցեր ՀՊՏՀ
Սեպտեմբերի 2-6-ը «Էրազմուս+» ծրագրի շրջանակում մեր բուհը հյուրընկալել է Վարշավայի տնտեսագիտական համալսարանի (Լեհաստան) դասախոս Իզաբելա Ռուդզկային, սեպտեմբերի 23-27-ը՝ Ալեքսանդրու Իոան Կուզայի համալսարանի (Ռումինիա) դասախոս Իրինա Բիլանին։ Այցի ընթացքում գործընկեր համալսարանների ներկայացուցիչները հանդիպումներ են ունեցել ՀՊՏՀ միջազգային կապերի և ֆոնդահայթայթման բաժինների, «Ամբերդ» հետազոտական կենտրոնի աշխատակիցների հետ։
Իզաբելա Ռուդզկան տնտեսության կարգավորման և միջազգային տնտեսական հարաբերությունների ֆակուլտետի ուսանողների համար դասախոսել է «Կայուն, էկո, կանաչ, խելացի քաղաքներ» թեմայով, իսկ Իրինա Բիլանը՝ ֆինանսական ֆակուլտետի ուսանողների համար՝ «Պետական պարտքի կառավարումը ԵՄ երկրներում» թեմայով։
Հանդիպումների ընթացքում ՀՊՏՀ աշխատակիցներն ու հյուրերը քննարկել են երկկողմ հետաքրքրություն ներկայացնող հարցեր, նախանշել նոր համատեղ անելիքներ։