ՀՊՏՀ վոլեյբոլիստները առաջին անգամ կմասնակցեն ՀՎՖ գավաթի խաղարկությանը

ՀՊՏՀ վոլեյբոլի աղջիկների ընտրանին առաջին անգամ մասնակցում է Հայաստանի վոլեյբոլի ֆեդերացիայի (ՀՎՖ)  խաղարկությանը: Մեր աղջիկները 4 թիմերի շարքում  կպայքարեն ՀՎՖ 2015 թ. գավաթը նվաճելու համար: Խաղարկությանը,  մասնակցելու են  «Նժդեհ», ԽՄՕՄՄ, ՀՊՏՀ և «Վան»  աղջիկների թիմերը:

«ՀՎՖ գավաթ-2015»-ը մեկնարկում է այսօր և կեզրափակվի դեկտեմբերի 13-ին: Խաղերն անցկացվելու են մեր բուհի մարզադահլիճում, ՀՊՏՀ հավաքականն այսօր խաղալու է ժամը 16.00-ին:

Մեզ հետ զրույցում ՀՊՏՀ ֆիզդաստիարակության, ԱԻ և քաղպաշտպանության ամբիոնի ղեկավար Հովհաննես Գաբրիելյանը նշեց, որ վերջին շրջանում մեր բուհի  մարզիկները զգալի հաջողություններ են արձանագրում:

«ՀՊՏՀ-ում առանձնահատուկ տեղ է գրավում վոլեյբոլ մարզաձևը, աղջիկների հավաքականում կան ուժեղ մարզուհիներ  և   ՀՎՖ գավաթի խաղարկությունը լավ առիթ է, որպեսզի մեր ընտրանին չափի ուժերը: Ի դեպ, մեր թիմը այս խաղարկությունում միակ համալսարանական թիմն է: Նշեմ, որ ունենք վոլեյբոլի աղջիկների հավաքականի հիանալի մարզիչ՝ ի դեմս պարոն Սիմոն Հակոբյանի, ով ջանասիրաբար աշխատում է մեր ընտրանու հետ»,-ասաց Հովհաննես Գաբրիելյանը:

ՀՊՏՀ վոլեյբոլի  աղջիկների հավաքականի մարզիչ, մեր բուհի ֆիզդաստիարակության և  ԱԻ և քաղպաշտպանության ամբիոնի դասախոս, պրոֆեսոր Սիմոն Հակոբյանը  բարձր գնահատեց թիմի մարզավիճակը և նշեց, որ եթե մրցասպարեզ են մտնում, ուրեմն, հաղթանակի ակնկալիք ունեն: Նրա խոսքով՝ մարզուհիները այս օրերին քրտնաջան պարապել են, խանդավառված են:

Մենք զրուցել ենք նաև մեր  վոլեյբոլիստուհիների  հավաքականի ավագ, սպորտի վարպետ Նարե Հովհաննիսյանի հետ, ով ասաց, որ թիմը մարտական է տրամադրված, հաղթանակի ակնկալիքները մեծ են:

Բոլոր մարզասերները հրավիրվում են ՀՊՏՀ մարզադահլիճ՝ քաջալերելու մեր մարզուհիներին:

ՀՊՏՀ թիմին մաղթում ենք հաղթանակ:

ՀՊՏՀ Լրատվության և հասարակայնության հետ կապերի բաժին