Մեկնարկել է ուսանողական խաղերի աշնանային փուլը. ՀՊՏՀ-ն արձանագրել է 1-ին հաղթանակը

Հրաձգության մրցաշարով սեպտեմբերի 27-ին  մեկնարկել է ՀՀ հանրապետական ուսանողական մարզական 16-րդ խաղերի աշնանային փուլը, և Տնտեսագիտական համալսարանի թիմն այս փուլում արձանագրել է իր առաջին հաղթանակը՝ 2-րդ տարին անընդմեջ նվաճելով հրաձգության առաջնության չեմպիոնի կոչումը:  Իսկ աղջիկների անհատական պայքարում, 50 հնարավորից 45 միավոր վաստակելով, ՀՊՏՀ ուսանողուհի, միջազգային մրցաշարերի մասնակից, սպորտի վարպետ Էլմիրա Կարապետյանը նվաճել է ոսկե մեդալ: Մրցանակակիրները պարգևատրվել են  մեդալներով, պատվոգրերով և գավաթներով: Այս մասին մեզ տեղեկացրեց ՀՊՏՀ ֆիզդաստիարակության, Աի և քաղպաշտպանության ամբիոնի վարիչի ժ/պ Հովհաննես Գաբրիելյանը:

Համալսարանական թիմերից յուրաքանչյուրում ընդգրկված են եղել 3 ուսանող՝ երկու հրաձիգ և մեկ հրաձգուհի: ՀՊՏՀ թիմը հանդես է եկել հետևյալ կազմով՝ Տիգրան Գասպարյան, Տիգրան Եգանյան և Էլմիրա Կարապետյան: Հրաձգության առաջնությանը մասնակցել է հայաստանյան 6 բուհ (Հայաստանի պետական տնտեսագիտական համալսարան, Երևանի պետական համալսարան, Երևանի գեղարվեստի պետական ակադեմիա, Երևանի Մխիթար Հերացու անվան պետական բժշկական համալսարան, Հայաստանի ազգային պոլիտեխնիկական համալսարան, Հայաստանի ազգային ագրարային համալսարան):

«Այս առաջնությանը մեր համալսարանի թիմը փայլուն մասնակցություն ունեցավ: Նշեմ, որ անհատական պայքարում ՀՊՏՀ  ուսանողուհի Էլմիրայի վաստակած միավորը գերազանցեց նույնիսկ տղաների անհատական պայքարում գրանցված  ամենաբարձր միավորին: Ի դեպ, մեր բուհի նորաբաց հրաձգարանում ուսանողներն արդեն զարգացնում են իրենց հմտությունները, հրաձգության հանդեպ ուսանողների կողմից մեծ հետաքրքրվածություն է նկատվում»,- մեզ հետ զրույցում ասաց Հովհաննես Գաբրիելյանը:

Նշենք, որ հրաձգության մրցումները հանրապետական ուսանողական խաղերի ծրագրում ընդգրկվել են անցյալ տարվանից, այս տարի անցկացվեցին 2-րդ անգամ:

Ուսանողական մարզական 16-րդ խաղերը  կշարունակվեն  մինչև դեկտեմբեր, խաղերի շրջանակներում կանցկացվեն առաջնություններ լող, վոլեյբոլ, հանդբոլ, բասկետբոլ, ֆուտզալ մարզաձևերից:

Շնորհավորում ենք մեր թիմին, իսկ ուսանողուհի  Էլմիրա Կարապետյանին՝ անհատական և թիմային հաղթանակի առիթով:

Լուսանկարները տրամադրել է Հովհաննես Գաբրիելյանը:

ՀՊՏՀ Լրատվության և հասարակայնության հետ կապերի բաժին