ՀՊՏՀ ասպիրանտները՝ միջազգային հարթակներում

Ուկրաինայի Դոնեցկ և Սվետագորսկ քաղաքներում հունվարի 31-ից փետրվարի 2-ը տեղի է ունեցել 20-րդ հոբելյանական միջազգային գիտական-փորձարարական սեմինարը՝  նվիրված  արտաքին տնտեսական կապերի զարգացման և օտարերկրյա ներդրումների ներգրավման հիմնախնդիրներին: Միջազգային գիտաժողովին մասնակցել է ՀՊՏՀ միկրոէկոնոմիկայի և ձեռնարկատիրական գործունեության կազմակերպման ամբիոնի ասպիրանտ Հասմիկ Հովակիմյանը:

Ասպիրանտի տեղեկացմամբ՝ ինքը ներկայացվել է «Ներդրումային գրավչության և քաղաքական կայունության փոխազդեցությունը»   (''The interaction of investment attractiveness and political stability'')  թեմայով հոդված, որտեղ քննարկվում են երկրի ներդրումային գրավչության և քաղաքական կայունության հարցերը:  «Հոդվածը բացառիկ է նրանով, որ ոչ միայն հիմնավորում է  կապը այս երկու ցուցանիշների միջև (բազմաթիվ տնտեսագետներ են անդրադարձել ներդրումային գրավչության և քաղաքական կայունության հիմնախնդիրներին, սակայն նրանց հետազոտություններում նրանք հիմնավորել են միայն դրանց կապը), այլև  տնտեսագիտության մեջ առաջին անգամ ներկայացնում է  մի մոդել, որը հնարավորություն է տալիս քանակական գնահատման ենթարկել երկրի հաջորդ տարվա օտարերկրյա ուղղակի ներդրումների փոփոխության չափը՝ քաղաքական կայության տվյալ տարվա համաթվի փոփոխության  ազդեցության գնահատմամբ»,- հոդվածի բովանդակության մասին նշեց Հասմիկ Հովակիմյանը:

Գիտաժողովի նյութերի ժողովածուում (“Problems Of Foreign Economic Relations Development And Attraction Of Foreign Investments: Regional Aspect” Donetsk, 2014), որն  ունի համաշխարհային  Index Copernicus վարկանիշ, տպագրվել է  նաև ՀՊՏՀ միկրոէկոնոմիկայի և ձեռնարկատիրական գործունեության կազմակերպման ամբիոնի ասպիրանտ Սուրեն Պարսյանի հոդվածը՝ «Հայաստանի Հանրապետության ոչ մետաղական հանքաարդյունաբերական ձեռնարկությունների արտահանման կարողությունների գնահատականը» թեմայով, որի   շրջանակներում ուսումնասիրվել են ոչ մետաղական հանքանյութեր արդյունահանող և վերամշակող ձեռնարկությունների արտահանման կարողությունները, արտահանման ծավալները և շուկաները: Հոդվածում անրադարձ է եղել նաև ցեմենտ արտադրող ձեռնարկությունների արտադրատնտեսական գործունեությանը,  հիմնախնդիրներին, արտադրության և արտահանման ծավալների դինամիկային, ինչպես նաև նախանշվել են հնարավոր արտահանման շուկաները:

Հասմիկ Հովակիմյանը նաև տեղեկացրեց,  որ գիտաժողովին իր մասնակցությանն աջակցել է Հայաստանի երիտասարդական հիմնադրամը:

ՀՊՏՀ Լրատվության և հասարակայնության հետ կապերի բաժին