«Գործնական մարքեթինգ» խորագրով սեմինար. ընդհանուր գիտելիքներ՝ գովազդի մասին
ՀՊՏՀ-ում այսօր կայացավ «Գործնական մարքեթինգ» խորագրով սեմինար, որն անցկացվեց 1 դասաժամ տևողությամբ: Սեմինարը կազմակերպվել էր ՀՊՏՀ շարունակական և լրացուցիչ կրթության կենտրոնի և «Ayvazyan & Partners» ընկերության նախաձեռնությամբ:
Ի՞նչ է գովազդը, ի՞նչ նպատակներ ունի այն, ինչպիսի՞ն պետք է լինեն գովազդները. այս և նմանօրինակ մի շարք հարցերի պատասխաններ հնչեցին մարքեթինգի և բիզնեսի կազմակերպման ֆակուլտետում:
Սեմինարը վարեց ընկերության բիզնես թրեյներ Վահագն Դիլբարյանը, ով ուսանողներին ներկայացրեց մարքեթինգին վերաբերող հետաքրքիր տեղեկություններ ու գովազդային գաղտնիքներ: Սեմինարավարը տպավորիչ օրինակներով ներկայացրեց գովազդային հոլովակներ, որոնք մեծ հաջողություն են ունեցել՝ ապահովելով զգալի ֆինանսական եկամուտներ: Վերլուծելով այդ հոլովակները՝ վերհանվեցին այն հանգամանքներն ու գաղտնիքները, որոնք պետք է կիրառվեն գովազդում: Ներկայացվեցին գովազդի տեսակներն (էմոցիոնալ, հիշեցնող և այլն) ու տարբեր՝ ֆինանսական, դեղագործական, սննդի և այլ ոլորտների գովազդային առանձնահատկությունները, ինչպես նաև արտասահմանյան և հայաստանյան գովազդային շուկաների տարբերությունները:
Մեծ էր ուսանողների ուշադրությունն ու հետաքրքրությունը. կարևոր հանգամանք է, որ սեմինարն անցավ ինտերակտիվ. ուսանողներն ակտիվորեն պատասխանում էին բանախոսի հարցերին, հարց-պատասխանի միջոցով տրվեցին մի շարք հարցերի պատասխաններ:
Ըստ ուսանողների՝ նմանօրինակ սեմինարների անցկացումը նպաստում է իրենց գիտելիքների ընդլայնմանն ու ուսումնառությունն ավելի բազմաժանր է դարձնում:
«Ծանոթացա հետաքրքիր ու յուրօրինակ գովազդների գաղտնիքներին, որոնք շատ անհրաժեշտ են մեզ, գործնականում այն կկիրառենք: Հարկ է նշել, որ սեմինարը մատուցվեց պարզ, հասկանալի կերպով »,- ասաց մարքեթինգային հաղորդակցություններ մասնագիտացման մագիստրատուրա 1-ին կուրսի ուսանող Մարիամ Բայրամյանը:
«Տեղեկացա ընդհանուր գովազդային գործունեության սկզբունքներին, շատ հետաքրքիր էր ծանոթանալ հատկապես գովազդում կիրառվող յուրօրինակ հնարանքներին», - նշեց նույն մասնագիտացման մագիստրատուրայի 1-ին կուրսի ուսանող Աիդա Մաթևոսյանը:
ՀՊՏՀ Լրատվության և հասարակայնության հետ կապերի բաժին