Ո՞ր ֆակուլտետը կարժանանա «Լավագույն հումորային ծրագիր» մրցանակին. ավարտվեցին ՈւՀԱ ելույթները
«Ուսանողական աշուն-2016» մարզամշակութային փառատոնը մոտենում է եզրագծին. 1 մշակութային միջոցառում ևս, և կորոշվի հաղթող ֆակուլտետը: Երեկ մեկնարկած ՈւՀԱ մրցելույթներն ավարտվեցին այսօր՝ ՏԿ և ՄՏՀ, ինֆորմատիկայի և վիճակագրության, մարքեթինգի ֆակուլտետների ելույթներով: Ուրախներն ու հնարամիտները խնդություն ու ծիծաղ պարգևեցին հարյուրավոր ուսանողների: Տաղանդաշատ հումորիստ-ուսանողներից շատերն արդեն հայտնի էին նախորդ փառատոններից և հաճախ հենց նրանց՝ բեմում հայտնվելն էր առաջացնում հանդիսատեսի մեծ ոգևորությունը: Այսօրվա ելույթներն աչքի ընկան զվարճալի բեմադրություններով, զվարճալի կերպարներով, որ ուսանողները ստեղծել էին վարպետորեն:
Թե որ ֆակուլտետն է արժանացել ՈւՀԱ հաղթողի կոչմանը՝ հայտնի կդառնա դեկտեմբերի 12-ին կայանալիք գալահամերգի ընթացքում, իսկ նույն օրը, երգ ու պարի մրցույթներից հետո, կորոշվի «Ուսանողական աշուն-2016»-ի հաղթողը:
Հիշեցնենք, որ հաղթողը որոշվում է մարզական և մշակութային առաջնություններում ու մրցույթներում վաստակած միավորների հանրագումարի արդյունքում:
ՀՊՏՀ Լրատվության և հասարակայնության հետ կապերի բաժին