Հերթական այցը Եպիսկոպոսյանների ընտանիքին. օգնում են ՀՊՏՀ աշխատակիցներն ու ուսանողները
ՀՊՏՀ լեզուների ամբիոնի դասախոս Լուսինե Կարագուլյանի նախաձեռնությամբ, լեզուների ամբիոնի անձնակազմի, ռեկտորատի, հաշվապահական հաշվառման, անձնակազմի կառավարման, քարտուղարության բաժինների աշխատակիցների, տնտեսագիտություն մասնագիտության 1-ին կուրսեցիների աջակցությամբ և ուսանողներ Քնարիկ Սարգսյանի և Վահան Չոբանյանի անմիջական մասնակցությամբ հունիսի 29-ին այցելություն է կազմակերպվել Կոտայքի մարզի Բալահովիտ համայնքում ապրող Եպիսկոպոսյանների ընտանիքին, որտեղ մեծանում են 4 անչափահաս երեխաներ, և որոնց հետ 6 տարուց ավելի է, ձևավորվել է մարդկային, բարեկամական ու ջերմ հարաբերություններ:
«Այս անգամ ձեռք ենք բերել հեռուստացույց, միկրոալիքային վառարան, սնունդ, հագուստ, խաղալիքներ: Ընտանիքը մշտապես մեր տեսադաշտում է ու մեր հոգածության կենտրոնում, այս տարիների ընթացքում մանուկները հասակ են առել և նրանց հանդեպ մարդկային սիրո, բարեգթության այս դրսևորումը նաև լավ օրինակ է ուսանողների համար՝ կարիքավորին աջակցելու և օգնության ձեռք մեկնելու առումով»,- մեզ հետ զրույցում ասաց Լուսինե Կարագուլյանը, ապա շնորհակալություն հայտնեց բոլոր աջակիցներին և հավելեց, որ բարեգործությունը շարունակական է լինելու:
ՀՊՏՀ Լրատվության և հասարակայնության հետ կապերի բաժին