Սպորտ, ինտելեկտուալ և մշակութային խաղեր․ կայացավ «ՀՊՏՀ ուսանողական աշուն-2024» մարզամշակութային փառատոնի բացման արարողությունը
Տնտեսագիտական համալսարանում այսօր տեղի ունեցավ ավանդույթ դարձած «ՀՊՏՀ ուսանողական աշուն- 2024» մարզամշակութային փառատոնի պաշտոնական բացման արարողությունը, որը սպորտի, հումորի, ինտելեկտուալ և մշակութային խաղերի շուրջ է համախմբել ՀՊՏՀ հարյուրավոր ուսանողների։ Այս փառատոնը մեր բուհի ամենամասշտաբային ուսանողական միջոցառումներից է։ Փառատոնի ընթացքում, որը կտևի մեկ ամիս, համալսարանի բոլոր 6 ֆակուլտետները և ՀՊՏՀ ֆինանսատնտեսագիտական քոլեջը կպայքարեն լավագույնի կոչման համար, ինչը ապահովում է մրցակցային ոգի և նպաստում է թիմային աշխատանքին ու համագործակցությանը։
Բացման արարողությանը ներկա էին ՀՊՏՀ ուսանողական խորհրդի նախագահ Արև Մանուկյանը, ինչպես նաև ֆիզդաստիարակության, արտակարգ իրավիճակների և քաղպաշտպանության ամբիոնի դասախոսական կազմը, ովքեր ամբողջ փառատոնի ընթացքում իրենց աջակցությունն են ցուցաբերում ուսանողներին։
Փառատոն է վերադառնում նաև ուսանողների ամենասիրելի միջոցառումը՝ ավանդական դարձած Ուրախների և հնարամիտների ակումբը (ՈՒՀԱ)։ «ՀՊՏՀ ուսանողական աշուն-2024»-ը կեզրափակվի ավանդական մշակութային գալահամերգով, որի ժամանակ ուսանողները հանդես կգան երաժշտական և պարային ելույթներով։
Միջոցառման մյուս լուսանկարները՝ ՀՊՏՀ ֆեյսբուքյան պաշտոնական էջում