ՀՊՏՀ-ում կրկին «բաց դռների օր» էր. այցելուները 8-11-րդ դասարանցիներն էին
Այս տարի տնտեսագիտական մայր բուհում դիմորդների համար կազմակերպվեցին աննախադեպ թվով «բաց դռների օրեր». երևանյան և մարզային դպրոցների ավարտական դասարանների հարյուրավոր աշակերտներ ճանաչողական այց կատարեցին։ Նրանցից շատերը, անշուշտ, մեր այս տարվա դիմորդները կլինեն և ուսանող կդառնան՝ իրենց ընտրած համալսարանին արդեն իսկ քաջածանոթ։
Հաճելիորեն, մեր համալսարանի հանդեպ հետաքրքրություն է նկատվում նաև ապագա դիմորդների կողմից, և այսօր մեր հյուրերն էին 8-11-րդ դասարանների մի խումբ աշակերտներ։ Նրանց այցը կազմակերպվել էր Հայկական Կարմիր խաչի և ՈւԽ համագործակցությամբ։ Անմիջական մթնոլորտում դպրոցականները ծանոթացան ՀՊՏՀ մասնագիտություններին, ֆակուլտետներին, միջազգային կրթական ծրագրերին, շրջեցին ու մասնակիցը դարձան ուսանողական անցուդարձի։
asue.am-ի հետ զրույցում Հրազդանի թիվ 1 ավագ դպրոցի 11-րդ դասարանի աշակերտուհի Արմինե Ապրեսյանը նշեց, որ հետաքրքրված է մարքեթինգով և հաջորդ տարի հավանաբար ՀՊՏՀ է դիմելու. «Այսօր համոզվեցի, որ ՀՊՏՀ-ն լավագույն համալսարաններից է։ Երբ նախորդ ամռանը ուսումնասիրում էի ՀՀ բուհերն ու մասնագիտությունները, այն ինձ առանձնակի գրավեց և որոշեցի գալ ու տեղում ծանոթանալ։ Լուսանկարչությունն իմ հոբբին է, սիրում եմ ստեղծագործել և այն տնտեսագիտության հետ համատեղելով՝ որոշել եմ մարքեթինգի ոլորտում մասնագիտանալ»։
Մեր ապագա դիմորդներին հաջողություն ենք մաղթում։
ՀՊՏՀ մարքեթինգի և հասարակայնության հետ կապերի բաժին