ՀՊՏՀ-ում է Պորտոյի համալսարանի դասախոսը
Տնտեսագիտություն մասնագիտության 3-րդ կուրսում նոր ուսումնաշրջանի առաջին դասն այսօր վարեց Պորտոյի համալսարանի քաղաքաշինության ամբիոնի դասախոս Էմիլիա Ռոբելոն, որը ՀՊՏՀ-ում է ԵՄ «Էրազմուս+» ծրագրի շրջանակում:
«Շրջակա միջավայրի տնտեսագիտություն» առարկայի ներածական դասին նա խոսեց հողային հարաբերությունների կարգավորման միջազգային փորձի, անշարժ գույքի շուկայի և հողի շուկայի վրա էկոլոգիական գործոնի ազդեցության գնահատման, բնական ռեսուրսների գնահատման ժամանակակից մեթոդների (մասնավորապես քաղաքային հողերի գնագոյացման զարգացման մոտեցումների), ինչպես նաև «կանաչ» քաղաքաշինության մասին:
Դասին ներկա էին ՀՊՏՀ բնօգտագործման տնտեսագիտության ամբիոնի վարիչ Գագիկ Աղաջանյանը, ամբիոնի դասախոսներ:
Այս աշխատանքային շաբաթ Պորտուգալիայից ժամանած Էմիլիա Ռոբելոն տնտեսության կարգավորման և միջազգային տնտեսական հարաբերությունների ֆակուլտետի ուսանողների համար 8 ժամ կդասախոսի բնօգտագործման տնտեսագիտությանն առնչվող թեմաների շուրջ:
ՀՊՏՀ միջազգային կապերի բաժնից հայտնում են, որ մեկնարկող կիսամյակում նախատեսվում է հյուրընկալել «Էրազմուս+»-ի գործընկեր համալսարանների այլ դասախոսների:
ՀՊՏՀ Լրատվության և հասարակայնության հետ կապերի բաժին