Դուք ունեք միայն մեկ խնդիր՝ լավ սովորել. ՀՊՏՀ ռեկտորը հանդիպեց կառավարման ֆակուլտետի առաջին կուրսեցիներին
![](https://asue.am/images/1521617881/dabbdd1bdd7f5ccc3c43683c.jpg)
«Դուք ունեք միայն մեկ խնդիր՝ լավ սովորել, մնացած խնդիրները՝ թե ուսման վարձերի, թե սոցիալական այլ հարցերի հետ կապված, փորձելու է լուծել բուհի ղեկավարությունը՝ գործողության մեջ դնելով հատուկ առաջին կուրսեցիների համար մշակված կանոնակարգը»,- այսօր կառավարման ֆակուլտետի առաջին կուրսեցիների հետ հանդիպմանը հայտարարեց ՀՊՏՀ ռեկտոր Կորյուն Աթոյանը՝ ներկայացնելով Տնտեսագիտական համալսարանի կողմից մշակված և գործողության մեջ դրված սոցիալական ծրագրերը, որոնց նպատակը ուսանողների սոցիալական հոգսերը թեթևացնելն է:
Հիշեցնենք, որ սեպտեմբերի 3-ից սկսած ՀՊՏՀ ռեկտորը հանդիպումների շարք է սկսել բուհի բոլոր ֆակուլտետների առաջին կուրսեցիների հետ և նրանց է ներկայացնում համալսարանի կողմից իրականացվող սոցիալական ծրագրերը: Այսօրվա հանդիպմանը ևս ռեկտորը նշեց, որ պահպանելով զեղչերի նախկին համակարգը համալսարանն իր կողմից մշակված կանոնակարգով նախատեսում է 5-20.000 ամսական կրթաթոշակներ տրամադրել լավ սովորող (մոգը՝ սկսած 70,1-ից) ուսանողներին, մարզերից եկած ուսանողներին գրեթե անվճար ապահովել հանրակացարանով, նվազագույն գներով ապահովել ուսանողների սնունդը՝ ՀՊՏՀ նորաբաց ճաշարանում: Կորյուն Աթոյանը կոչ արեց բոլոր այն ուսանողներին, ովքեր իրենց սոցիալապես անապահով են համարում, դիմել դեկանատներ և դիմումներ գրել, որոնք կներկայացվեն ռեկտորատ և կստանան համապատասխան լուծումներ:
Եվս մեկ անգամ շնորհավորելով Տնտեսագիտական համալսարան ընդունվելու կապակցությամբ՝ ռեկտորը հույս հայտնեց, որ նոր ընդունվածները կկարողանան արագորեն ինտեգրվել բուհական կյանքին, ինչպես նաև կոչ արեց ակտիվացնել շփումները ուսանողական խորհրդի հետ: «Մեր ծրագրերը բազմաթիվ են՝ սկսած բուհի միջավայրը բարեկարգելուց մինչև կրթության որակի բարձրացում: Մենք պատրաստ ենք լսելու ձեր բոլոր առաջարկները, քննարկելու առկա բոլոր խնդիրները»,- հայտարարեց Կորյուն Աթոյանը՝ ուսանողներին հրավիրելով համալսարանի ղեկավարության հետ համագործակցության:
Վաղը ինֆորմատիկայի և վիճակագրության ֆակուլտետի առաջին կուրսեցիների հետ հանդիպմամբ կավարտվի ուսանողների հետ ռեկտորի հանդիպումների շարքը:
ՀՊՏՀ Լրատվության և հասարակայնության հետ կապերի բաժին