«Ամբերդ» հետազոտական կենտրոնի ներկայացուցիչները՝ միջազգային գիտական զեկույցի համահեղինակներ
ՀՊՏՀ «Ամբերդ» հետազոտական կենտրոնը՝ ի դեմս տնօրեն, տ.գ.դ., պրոֆեսոր Դավիթ Հախվերդյանի և հետազոտող Ռուզաննա Թադևոսյանի, երկրորդ տարին անընդմեջ մասնակցում է «ԵԱՏՄ ինտեգրացիոն գործընթացների գնահատում առևտրի ոլորտում» միջազգային զեկույցի պատրաստմանը և ԵԱՏՄ ինտեգրման ինդեքս 2021-ի հաշվարկմանը։
Այս մասին հայտնում են «Ամբերդից» և հավելում, որ 2021 թ. ապրիլի 27-ին «Տնտեսության և հասարակության զարգացման խնդիրների վերաբերյալ 22-րդ միջազգային գիտաժողովի» շրջանակներում տեղի է ունեցել «ԵԱՏՄ առևտրի ոլորտում ինտեգրացիոն գործընթացների գնահատում. ինտեգրման ինդեքս 2021 և կարճաժամկետ փոփոխող միտումներ (ԵԱՏՄ+)» թեմայով առցանց կլոր սեղան-քննարկում։
Նշենք, որ ՌԴ «Տնտեսագիտության բարձրագույն դպրոց» ազգային հետազոտական համալսարանը, Համաշխարհային բանկի հետ համատեղ, կազմակերպում է տարեկան միջազգային գիտաժողով՝ տնտեսության և հասարակության զարգացման խնդիրների վերաբերյալ։ «Տնտեսագիտության բարձրագույն դպրոցի» Առևտրային քաղաքականության ինտիտուտն ամեն տարի գիտաժողովի շրջանակում իրականացնում է ասոցացված միջոցառում, որի շրջանակներում 2018 թվականից պատրաստվում է «ԵԱՏՄ ինտեգրացիոն գործընթացների գնահատում առևտրի ոլորտում» թեմայով միջազգային զեկույց։
Այսպիսով, «Ամբերդը», Ռուսաստանի, Բելառուսի, Ղազախստանի և Ղրղզստանի գործընկերների հետ մասնակցել է զեկույցի պատրաստման աշխատանքներին, որի արդյունքները ներկայացվել են կլոր սեղան-քննարկման ընթացքում։
Դավիթ Հախվերդյանը առցանց կլոր սեղանի ընթացքում հանդես է եկել «Ներդրումների ոլորտի կարգավորման քաղաքականության գնահատում» զեկուցմամբ, ներկայացրել է ԵԱՏՄ երկրների ՕՈՒՆ իրավական կարգավորման առանձնահատկությունները, առկա սահմանափակումները և օրենսդրությունների միասնականացման հնարավորությունները։
Զեկույցի ամբողջական տարբերակը հասանելի է հետևյալ հղումով։
ՀՊՏՀ մարքեթինգի և հասարակայնության հետ կապերի բաժին