Հավաստագրեր շնորհվեցին ՀՊՏՀ Change Lab-ի աքսելերացիոն ծրագրի մասնակից ստարտափներին
Ամփոփվեց ՀՀ ԲՏԱ նախարարության «Գաղափարից մինչև բիզնես» նորարարական բաղադրիչով դրամաշնորհային ծրագրի շահառու ստարտափների համար նախատեսված եռամսյա աքսելերացիոն ծրագիրը, որն իրականացնում էր ՀՊՏՀ Change Lab-ը: Ամենատարբեր բնագավառներում գործունեություն ծավալող 6 ստարտափներ հնարավորություն ունեցան զարգացնելու իրենց պրոդուկտները, ինչպես նաև թիմերի անդամների հմտությունները:
Ստարտափների թիմերին երեկ՝ մայիսի 10-ին, Change Lab-ում հավաստագրեր հանձնեց ՀՊՏՀ ռեկտոր Դիանա Գալոյանը։ Ռեկտորը նշեց, որ ՀՀ բարձր տեխնոլոգիաների նախարարության հետ նմանօրինակ ձևաչափով սա առաջին համատեղ ծրագիրն է, թեև ՀՊՏՀ-ն ստարտափների հետ աշխատել է նաև նախկինում։ «Այսօր մեր համալսարանը որդեգրել է միջազգայնացման ուղին, և այդ համատեքստում մենք կարևորում ենք հենց միջազգային ֆոնդերի ներգրավումը, հատկապես՝ երիտասարդական ձեռնարկատիրության շրջանակներում։ Կարծում եմ՝ հետագայում հնարավորություն կունենանք այդ գործընթացներում ներգրավելու նաև ձեզ»,- ասաց Դիանա Գալոյանը՝ հավելելով, որ գործնական հմտություններ ու կարողություններ փոխանցելու իր գործառույթը ՀՊՏՀ Change Lab-ը հաջողությամբ իրականացնում է։
Աքսելերացիոն ծրագրի առաջին բաղադրիչը ներառել է 9 թեմատիկ դասընթաց, այդ թվում՝ ֆինանսներ, ստարտափների ֆինանսավորման փուլեր, թվային մարքեթինգ, բրենդինգ, ռազմավարական բիզնես մտածողություն, նախագծերի կառավարում agile միջավայրում և այլն: Ծրագրի մյուս հիմնական բաղադրիչը մենթորների հետ աշխատանքն էր: Յուրաքանչյուր ստարտափ, հաշվի առնելով վերջինիս ոլորտային նախապատվությունը, հնարավորություն է ունեցել ավելի քան 2 ամիս աշխատելու փորձառու մենթորների հետ: Մենթորության շրջանակներում ստարտափները զարգացրել են իրենց պրոդուկտները, համապատասխանեցրել շուկայի պահանջներին, ինչպես նաև միջազգային շուկայում կապեր ձեռք բերելու նախադրյալներ ձևավորել։ Ստարտափների գործունեությունը հանգամանորեն լուսաբանվել է նաև ՀՊՏՀ կայքում, նկարահանվել են կարճ տեսահոլովակներ։ Աքսելերացիոն ծրագրի համակարգող Գրիշա Ամիրխանյանի փոխանցմամբ՝ այս քայլերը, վստահաբար, կօգնեն վերջիններիս ճանաչելիության բարձրացմանը և պրոդուկտների առաջխաղացմանը:
«Թեև աքսելերացիոն ծրագիրը ֆորմալ առումով ավարտվում է, սակայն ՀՊՏՀ-ի և ստարտափների համագործակցությունը երկարաժամկետում կշարունակվի: Պատրաստ ենք մեր ներուժով հնարավորինս աջակցել վերջիններիս, կլինի դա խորհրդատվական աջակցություն, թե տարաբնույթ կապերի հաստատում: Համոզված եմ նաև, որ ստարտափների հաջողված փորձը ոգևորիչ կլինի մեր ուսանողների համար ևս, որոնք շահագրգռված կլինեն ներգրավվել տարբեր ստարտափներում և ստեղծել սեփականները»,- ասաց Գրիշա Ամիրխանյանը:
«Դուդուկ» ընկերության կոնտենտ մենեջեր Աննա Մուրադյանի խոսքով՝ ծրագիրը բավականին հետաքրքիր էր, քանի որ ի սկզբանե նախատեսված էր հենց ստարտափների համար. «Ծրագիրը մեզ հնարավորություն տվեց բազմաթիվ հետաքրքիր ծանոթություններ հաստատելու, բանիմաց մենթորի հետ աշխատելու։ Բարձր ենք գնահատում հատկապես ռեկտոր Գալոյանի անմիջական մոտեցումը՝ մեր առաջարկները լսելու և դրանց ընթացք տալու առումով»։
«Ռոբոդել» ընկերության համահիմնադիր Հայկ Քոսյանը խոստովանում է՝ թիմն սկզբում փոքր-ինչ թերահավատորեն էր տրամադրված, քանի որ Change Lab-ի հետ աշխատելու փորձ չունեին, բայց ընթացքում բոլոր մտավախություններն ի չիք դարձան։ «Ամեն ինչ հրաշալի էր կազմակերպված, արդյունավետ էր, դասախոսները ճկունություն էին ցուցաբերում, նյութը մատուցում էին՝ ելնելով լսարանի պահանջներից»,- ասաց Հայկը՝ հավելելով, որ Change Lab-ում մթնոլորտը կառուցողական է ու անմիջական: Ուրախալի է բուհական միջավայրում տեսնել նորարարական մտածողությամբ և գաղափարի շուրջ համախմբված բանիմաց մասնագետների այսպիսի թիմ: