Մասնագիտության արդի հիմնախնդիրների շուրջ՝ ՈւԳԸ ֆակուլտետային նիստում
Հաշվապահական հաշվառման և աուդիտի ֆակուլտետում այսօր տեղի է ունեցել Ուսանողական գիտական ընկերության նիստ, որին մասնակցել են բակալավրիատի ավագ կուրսերի ուսանողներն ու մագիստրանտները: Հնչել են 13 զեկուցումներ՝ ֆինանսական հաշվառման, կառավարչական հաշվառման և աուդիտի արդի հիմնախնդիրների շուրջ: Նիստը համակարգել են ֆինանսական հաշվառման ամբիոնի ասիստենտ, տ.գ.թ. Անուշ Գասպարյանը և կառավարչական հաշվառման ամբիոնի ասիստենտ, տ.գ.թ. Նարինե Միրզոյանը: Թեմաների ընտրության և ուսումնասիրության հարցում ուսանողներին աջակցել են նշված ամբիոնների դասախոսները:
Գիտական միջոցառմանը ներկա են եղել հաշվապահական հաշվառման և աուդիտի ֆակուլտետի դեկանի պաշտոնակատար Մերի Բադալյանը, դեկանի տեղակալ Սոնա Ղազարյանը, կառավարչական հաշվառման և աուդիտի ամբիոնի վարիչ, տ.գ.դ., դոցենտ Լիանա Գրիգորյանը, դասախոսներ:
Մեզ հետ զրույցում Լիանա Գրիգորյանն ասաց, որ նիստին մասնակցել են ֆակուլտետի լավագույն ուսանողները, որոնք կատարել են արժեքավոր գիտահետազոտական աշխատանքներ, ներկայացրել կիրառական նշանակություն ունեցող առաջարկություններ:
«Համախմբել ենք ֆակուլտետի գիտական ներուժը և այս փուլի արդյունքում ընտրել ուսանողների, որոնք կմասնակցեն ՈւԳԸ համալսարանական փուլին: Երիտասարդ հետազոտողներն իրենց զեկուցումներում անդրադարձել էին Հարկային օրենսգրքի 2018թ. նախատեսվող փոփոխություններին, քաջատեղյակ էին իրենց մասնագիտական ոլորտին առնչվող մերօրյա խնդիրներին: Արձանագրենք, որ ուսանողները կարողանում են ինքնուրույն ուսումնասիրություններ կատարել, օգտվել արժանահավատ աղբյուրներից և մշակել վերհանված հիմնախնդիրներին ուղղված առաջարկություններ»,-ասաց ամբիոնի ղեկավարը:
Նշենք, որ այսօր զեկուցումներով հանդես են եկել մագիստրանտներ Էլեն Ավալյանը և Հռիփսիմե Ալբերտյանը, 4-րդ կուրսի ուսանողներ՝ Դավիթ Վարդանյանը, Լալա Պետրոսյանը, Տաթևիկ Դավթյանը, Լիանա Մնոյանը, Մերի Մելքոնյանը, 3-րդ կուրսից՝ Աշխեն Սուլթանյանը, Արամ Մելքումյանը, Լիլիթ Հկիլիկյանը, Իսկուհի Քամալյանը, Արաքսյա Շաքրիկյանը, Միլենա Թարվերդյանը:
ՀՊՏՀ Լրատվության և հասարակայնության հետ կապերի բաժին