Մուտքդ բարի, 2016 թվական. շնորհավոր Ամանոր և Սուրբ ծնունդ
Հաշված ժամեր անց պատմություն է դառնալու 2015 թվականը: Գալիս է նոր տարին՝ լի բազում անակնկալներով, հրաշքներով ու մարտահրավերներով:
Ամանորը ամենաերազային տոնն է, որը հրաշքի սպասում է պարգևում աշխարհի միլիոնավոր մարդկանց: Սա թերևս այն միակ տոնն է, որ բարությամբ ու սիրով է լցնում մարդկանց հոգիները, նվիրում` երջանկություն ապրելու չգրված իրավունք:
Յուրաքանչյուրս ամանորյա հեքիաթ ենք հյուսում մեզ համար, որում կան նպատակներ, ցանկություններ ու նվիրական երազանքներ: Ասում են, երազանքները իրականանում են, եթե հավատում ես: Ամանորը հենց ամենամեծ առիթն է հավատալու ինքներս մեզ և իրագործվելու սպասող երազանքներին: Ուրեմն, հավատանք սրտում փայփայած այն նպատակներին, որոնք ունակ են կյանքին թարմ շունչ հաղորդելու, այն գեղեցիկ ու գունեղ դարձնելու:
Անցնող տարին լի էր աշխարհաքաղաքական զարգացումներով ու բախումներով, որոնք մեզ կարծես պարտավորեցրին առավել բարձր գիտակցել համամարդկային վեհ արժեքի՝ Խաղաղության գինը:
Առաջին հերթին, մեր երկրի խաղաղության համար պարտական ենք հայ զինվորին, որ սահմանին վստահորեն անառիկ է պահում հայրենիքի սահմանները, ուստի մաղթում ենք նրան ամուր կամք ու կորով, քաջառողջություն ու բարձր ոգի:
Թո'ղ Ամանորը ցանկալի խաղաղություն սփռի աշխարհում, անդորր, որը սկզբնաքարն է յուրաքանչյուր ժողովրդի գոյության, արժանապատիվ ապրելու, արարելու: Խաղաղություն՝ հանուն հայրենիքի և աշխարհի բարօրության:
Գալդ բարի, 2016 թվական: Շնորհավոր Ամանոր և Սուրբ ծնունդ:
ՀՊՏՀ Լրատվության և հասարակայնության հետ կապերի բաժին