Տնտեսագիտական համալսարանում շարունակվում են միջավայրի արդիականացման ու կրթական տեխնոլոգիաների ներդրման աշխատանքները (լուսանկարային շարք)

Հայաստանի պետական տնտեսագիտական համալսարանում «Մենք փոխվում ենք» կարգախոսի ներքո իրականացվող բարեփոխումներն ու բարենորոգումները շարունակվում են: Մեր համալսարանն այս ուսումնական տարին ևս ուսանողներին և աշխատակիցներին ներկայացավ բարեկարգված միջավայրով, արդիական լսարաններով և ուսումնական սրահներով, տեխնիկապես վերազինված:

Համալսարանի գրեթե բոլոր ֆակուլտետներում ամռանը թափ առած վերանորոգման աշխատանքները ավարտվել են ու այսօր ամբողջ համալսարանը բարենորոգված է  և «շնչում է» ՀՊՏՀ բրենդային գույներով: Մեր սիրելի կրթօջախը ավելի է գեղեցկացել, փոխվել են նաև հատակները, աստիճանների բազրիքները, պատուհանագոգերը, երկու ֆակուլտետների մուտքերն ու աստիճանները, ֆոեներն ու սրահները ձևավորվել են բնական ծառերով:

Շարունակվում է նաև կրթական գործընթացում նորագույն տեխնոլոգիաների ներդրման գործընթացը: Կառավարման ֆակուլտետի լսարաններից մեկում  ներդրվել և արդեն գործարկվել է ինտերակտիվ գերկարճաֆոկուսային պրոյեկտոր, որն ապահովում է կրթական գործընթացի որակական բարձրացում, արդյունավետորեն աջակցում է թիմային աշխատանքին և խմբակային ուսուցմանը՝ շնորհիվ ներդրված ինտերակտիվ գործիքների, և թույլ է տալիս լսարանում ստանալ լիովին ինտերակտիվ լուծում: Գերկարճաֆոկուսային պրոյեկտորն առաջարկում է ֆունկցիաների լայն շրջանակ և թույլ է տալիս անլար ցանցով միացնել մինչև 50 սարք: Այն ապահովում է տեղեկատվության ակնթարթային կոլեկտիվ օգտագործում Miracast տեխնոլոգիայի և NEC DisplayNote ծրագրային ապահովման շնորհիվ, ինչպես նաև միաժամանակյա աշխատանքի համար այնպիսի ֆունկցիաներ, ինչպիսիք են անոտացիան, քվեարկությունը, և այլն: Ունկնդիրները կարող են դիտել տեղեկատվությունը միաժամանակ 16 սարքերից, իսկ ինֆորմացիան կարող է պրոյեկտորից փոխանցվել վեբ բրաուզերներ: Ուսանողները և դասախոսական կազմը կարող են նշումներ կատարել ցանկացած պատի կամ գրատախտակի վրա՝ առանց համակարգչի օգտագործման: Այս համակարգը դուալ է, այսինքն՝ լուսապատկերը լսարանի երկու կողմերում է և մեկի վրա աշխատելիս, արդյունքը տեսանելի է նաև երկրորդում:

Նիստերի սրահում ներդրվել է աուդիոկոնֆերանսի համակարգ՝ միկրոֆոններով և համապատասխան սարքավորումներով: Ֆինանսական ֆակուլտետում գործարկվել է հայտարարությունների էլեկտրոնային տախտակ, որը անհրաժեշտ ինֆորմացիան արագ կերպով հասանելի է դարձնում հետաքրքրվողներին:

Համակարգչային քննասենյակները հագեցել են տեխնիկական նոր սարքավորումներով, տեսախցիկներով, ինչը միտված է քննություններն ավելի թափանցիկ դարձնելու նպատակին: Ռեկտոր Կորյուն Աթոյանն օն-լայն ռեժիմով հետևում է քննական գործընթացին:  Նոր ուսումնական տարում համալսարանը ձեռք է բերել 60 նոր համակարգիչ՝ լաբորատորիաները, գրադարանը և աշխատասենյակները տեխնիկապես վերազինելու համար: Ձեռք է բերվել նաև 1 պլաստիկ քարտի տպիչ, որն անհրաժեշտ է գրադարանային սպասարկումը բարելավվելու համար: «Տնտեսագետ» հրատարակչության համար ձեռք է բերվել նաև տպագրական պրոֆեսիոնալ մեքենա՝ սև-սպիտակ տպագրության համար: Հիշեցնենք, որ գունավոր տպագրության համար պրոֆեսիոնալ տպագրության սարք համալսարանը ձեռք էր բերել դեռ մի քանի տարի առաջ:

Մարքեթինգի և բիզնեսի կազմակերպման ֆակուլտետում վերանորոգվել և պատրաստվել է մուտքի մեկ նոր կետ՝ նոր պտտադռնակով: Այս նոր մուտքը, որը կգործի առաջիկայում, բավական կբեռնաթափի գլխավոր և ֆինանսական մասնաշենքերի մուտքերը:

Հիշեցնենք նաև, որ ՀՊՏՀ ուսանողական խորհրդի նախաձեռնությամբ, ՀՀ ՊՆ, ՀՊՏՀ ղեկավարության և ՀԵՀ աջակցությամբ համալսարանում բացվել է հրաձգարան:

Ռեկտոր Կորյուն Աթոյանը լրատվության և հասարակայնության հետ կապերի բաժնի հետ զրույցում, անդրադառնալով կատարված աշխատանքներին, նշեց. «Յուրաքանչյուր ուսումնական տարի մեր համալսարանը սկսում է նորույթներով՝ միջավայրի արդիականացումից մինչև տեխնիկական վերազինում: Այս բոլոր քայլերի նպատակը մեկն է՝ ուսանողների համար ավելի բարենպաստ դարձնել ուսումնական գործընթացը, կրթական միջավայրը, իսկ աշխատակիցների համար գրավիչ դարձնել աշխատավայրը: Համալսարանը բոլոր ուղղություններով ուժեղացնելն ու մրցունակ դարձնելը մեր գերնպատակն է, որին ուղղված մեր քայլերը շարունակական են: Պետք է կարողանանք հասնել նրան, որ կրթօջախի զորացմանն ուղղված բոլոր նախաձեռնությունները նպաստեն կրթության որակի բարձրացմանը»:

Համալսարանի ղեկավարը տեղեկացրեց նաև, որ օրակարգում է լսարանային գույքի թարմացման խնդիրը, այս պահին փնտրվում է լավագույն, ժամանակակից լուծումը:

Լուսանկարները շարունակեք դիտել այստեղ:

ՀՊՏՀ Լրատվության և հասարակայնության հետ կապերի բաժին