«Հայբիզնեսբանկում» մեկնարկեցին ՀՊՏՀ ուսանողների վարպետության դասերը

Տնտեսագիտական համալսարանի բանկային գործ մասնագիտության 4-րդ կուրսի 57 ուսանող «Հայբիզնեսբանկում»  կմասնակցի  վարպետության դասերի: Այսօր  բանկի դահլիճում  հանդիսավոր կերպով  տրվեց դասընթացների մեկնարկը: Հանդիպմանը ներկա էր ՀՊՏՀ բանկային գործի  և ապահովագրության ամբիոնի վարիչի ժ/պ, տ.գ.դ., պրոֆեսոր  Աննա Ասլանյանը:

Ներկաներին ողջունեց «Հայբիզնեսբանկի»  աշխատակազմի ղեկավար Մարի Ստեփանյանը, ով իր խոսքում շնորհակալություն հայտնեց ՀՊՏՀ ռեկտոր Կորյուն Աթոյանին և ամբիոնի վարիչ Աննա Ասլանյանին՝  կարևոր և օգտակար նախաձեռնության համար:

««Հայբիզնեսբանկը» սիրով ընդառաջեց այս նախաձեռնությանը և ստեղծեց մի ծրագիր, որը հատուկ ուսանողների համար է: Վարպետության դասերի ընթացքում մեր լավագույն մասնագետները իրենց փորձը  և գիտելիքները կփոխանցեն ձեզ»,-ասաց Մարի Ստեփանյանը:

Ողջույնի խոսքով հանդես եկավ Աննա Ասլանյանը՝ նշելով, որ առաջին անգամ ՀՊՏՀ ուսանողների համար «Հայբիզնեսբանկում» կազմակերպվում են վարպետության դասեր:

«Դասընթացների ընթացքում դուք ձեռք կբերեք գործնական գիտելիքներ, ինչպես նաև կծանոթանաք գործատուի պահանջներին, քանի որ հետագայում համալրելու եք բանկային համակարգի աշխատակիցների շարքերը»,-ընդգծեց  բանկային գործի և ապահովագրության ամբիոնի ղեկավարը և հույս հայտնեց, որ ուսանողները վարպետության դասերից կքաղեն առավելագույնը:

Ցուցադրվեց «Հայբիզնեսբանկի» մասին ֆիլմ, որն ամփոփ ներկայացնում էր բանկի գործունեությունը, առաքելությունը:

Առաջին դասի թեման  բանկի կորպորատիվ տարրերի վերաբերյալ էր: Ուսանողները մեծ հետաքրքրությամբ ունկնդրում էին բանախոսին:

Նշենք, որ վերոնշյալ  դասընթացները կտևեն մինչև այս կիսամյակի ավարտը, ուսանողներին կտրվեն մասնակցության հավաստագրեր:

ՀՊՏՀ Լրատվության և հասարակայնության հետ կապերի բաժին