Այսօր Հայ մամուլի տոնն է
![](https://asue.am/images/1521617881/d0c3d76eaf3be761d6f40a0f.png)
Հայ մամուլի մեծ ընտանիքում, անհամար պարբերականների ու լրատվամիջոցների կողքին իր համեստ ավանդն է ներդնում նաև ՀՊՏՀ լրատվության և հասարակայնության հետ կապերի բաժինը՝ հրատարակության պատրաստելով բուհի պաշտոնական ամսագիրը՝ «Տնտեսագետը» և մեծ լրատվական եթեր ճանապարհելով ՀՊՏՀ պաշտոնական կայքի և ֆեյբուքյան էջի նորությունները:
Բոլոր այն մարդկանց, ովքեր իրենց միտքն ու եռանդն են ներդնում և կերտում են հայ մամուլի շարունակական պատմությունը, հղում ենք մեր ջերմ շնորհավորանքը, մաղթում բեղմնավոր գրիչ, ստեղծագործական հաջողություններ:
Հիշեցնենք, որ այս գեղեցիկ տոնի համար մենք պարտական ենք Հարություն Շմավոնյանին, ով 1794 թ. հոկտեմբերի 16-ին Հնդկաստանի Մադրաս քաղաքում ձեռնամուխ եղավ «Ազդարար» ամսագրի հրատարակման գործին` դառնալով հայկական լրագրության հայրը: «Ազդարարում» արծարծվում էին քաղաքական, հասարակական, բարոյական, մշակութային հարցեր: Կարճատև կյանք ունեցավ «Ազդարարը, սակայն այն հիմնաքարը դարձավ հայ մամուլի պատմության ու գոյության:
ՀՀ Կառավարության 2004 թ. ապրիլի 22-ի որոշմամբ հոկտեմբերի 16-ը նշվում է որպես «Մամուլի աշխատակցի օր», որը հետագայում վերանվանվել և դարձել է «Հայ մամուլի օր»:
![](https://asue.am/images/1521617881/54b7658d87908df8adabf245.png)
ՀՊՏՀ Լրատվության և հասարակայնության հետ կապերի բաժին