Դիլիջանի «Տնտեսագետ» մարզաառողջարանում հանգստացել է 507 մարդ

Հուլիսի 5-ից օգոստոսի 25-ը Դիլիջանի Բլդան գետի ափին գտնվող ՀՊՏՀ «Տնտեսագետ» մարզաառողջարանում այս տարի իր ամառային հանգիստն է անցկացրել 507 մարդ (ՀՊՏՀ աշխատակիցներ, ուսանողներ):

ՀՊՏՀ լրատվության և հասարակայնության հետ կապերի բաժնի հետ զրույցում մարզաառողջարանի պետ, մեր բուհի ֆիզդաստիարակության, ԱԻ և քաղպաշտպանության ամբիոնի դասախոս Հակոբ Կյոկչյանը նշեց, որ ինչպես ամեն տարի, այս տարի ևս, «Տնտեսագետը»  գործել է 4 հերթափոխով ՝ շուրջ 2 ամիս:

«Յուրաքանչյուր հերթափոխում հանգստացել է նաև 5-ական ուսանող Արցախի պետական համալսարանից, իսկ վերջին հերթափոխում  մարզաառողջարանը հյուրընկալել է ՀՊՏՀ 100 ուսանողի, այդ թվում՝ 10-ը Եղեգնաձորի մասնաճյուղից»,-նշեց Հակոբ Կյոկչյանը:

Ավանդույթի համաձայն՝ դիլիջանյան հանգստի ընթացքում կազմակերպվել են արշավներ դեպի Մաթոսավանք և Ջուխտակ վանք, էքսկուրսիաներ դեպի Հաղարծին և Գոշավանք:

Ճամբարի պետի խոսքով՝ հանգստացողների առօրյան հագեցած է եղել նաև մարզական խաղերով՝ վոլեյբոլ, սեղանի թենիս, շախմատ և այլն:

Մարզաառողջարանի պետը և նրա տեղակալ, ֆիզդաստիարակության, ԱԻ և քաղպաշտպանության ամբիոնի դասախոս Արման Գուլյանը կազմակերպել են ճամբարականների լիարժեք հանգիստը:

ՀՊՏՀ Լրատվության և հասարակայնության հետ կապերի բաժին