Մրցակցային միջավայրի ազդեցությունը տնտեսության ներառական աճի վրա. քննարկում ՀՊՏՀ-ում

Հայաստանի պետական տնտեսագիտական համալսարանը Շվեյցարիայի համագործակցության գրասենյակի Հարավկովկասյան բաժնի աջակցությամբ «Հայաստանում ներառական աճի խթանման քննարկումների հարթակի ստեղծում» ծրագրի շրջանակներում ՀՊՏՀ միջազգային ծրագրերի կենտրոնում այսօր անցկացրեց հերթական կլոր սեղան-քննարկումը «Մրցակցային միջավայրի, արտահանման և ներմուծման ազդեցությունը ՀՀ տնտեսության ներառական աճի վրա» խորագրով: Հիշեցնենք, որ այսօրվա հանդիպումը նշված ծրագրի շրջանակներում թվով 9-րդն էր:

Միջոցառմանը մասնակցում էին ՀՊՏՀ ուսումնամեթոդական աշխատանքների գծով պրոռեկտոր Պարույր Քալանթարյանը, ծրագրի կառավարման խումբը՝ ղեկավար Ներսես Գևորգյանի գլխավորությամբ, համալսարանի պրոֆեսորադասախոսական կազմի ներկայացուցիչներն ու ուսանողները, ՀՀ էկոնոմիկայի նախարարության և Տնտեսական մրցակցության պաշտպանության պետական հանձնաժողովի ներկայացուցիչներ՝ որպես ոլորտի պատասխանատուներ, փորձագետներ:

Բացման խոսքով հանդես եկավ ծրագրի կառավարման ղեկավար Ներսես Գևորգյանը՝ շնորհակալություն հայտնելով մասնակիցներին հրավերն ընդունելու համար: Նա նշեց, որ Շվեյցարիայի համագործակցության գրասենյակի Հարավկովկասյան բաժնի աջակցությամբ իրականացվող ծրագիրն ուղղված է հասարակությանը հուզող արդիական հարցերի քննարկմանը՝ կիզակետում ունենալով ներառական տնտեսության զարգացման տեսլականը Հայաստանում:

Թեմայի շուրջ որպես հիմնական զեկուցողներ հանդես եկան ՀՊՏՀ միջազգային տնտեսական հարաբերությունների ամբիոնի վարիչի ժամանակավոր պաշտոնակատար, տ.գ.թ., դոցենտ Գրիգոր Նազարյանը և նույն ամբիոնի դասախոս՝ տ.գ.դ., դոցենտ Դավիթ Հախվերդյանը:

Գրիգոր Նազարյանն իր խոսքում, մասնավորապես նշեց, որ ՀՀ տնտեսության մրցունակության և արտահանման ներուժի իրացման մասով կոռուպցիան, հարկային վարչարարությունը, հարկային դրույքաչա­փերը, կառա­վարչական բյու­րոկ­րա­տիայի անարդյունավետու­թյունը, աշխատողների որա­կա­վորման ցածր մա­կար­դակը մնում են այն հիմնա­խնդիրները, որոնք էականորեն խոչընդոտում են Հայաստանի մրցունակության բարձ­րացմանը: Մակրո­տնտեսական բնույթի գործոն­ների թվին, որոնք հանգեցրել են ՀՀ մրցունակության համաթվի անկ­մանը, դասվում են ազգային խնայողու­թյունների ցածր մակարդակը, աճող պետական պարտքը, գնաճի բարձր մակարդակը և այլն: Ընդ որում, ամենալուրջ հիմնախնդիրը, որ առկա է այս ոլորտում, նորարա­րու­թյունների և տեխնոլոգիական պատրաստվածության ցածր մակարդակն է: Դրա համար, Գրիգոր Նազարյանի խոսքով, նախևառաջ անհրաժեշտ է ստեղծել մրցակցային միջավայր, սրել մրցակցու­թյունը ՀՀ շուկայում, որը կստիպի ընկերություններին ներդնելու նոր տեխնոլո­գիաներ` ապրանքները շատ ավելի ցածր ծախսերով արտադրելու համար:

Ըստ Դավիթ Հախվերդյանի՝ այս առումով խիստ ար­դիա­կան են դառնում բուհական ոլորտի մրցու­նա­կության բարձրացման հիմնա­հար­ցերը, քանի որ կրթության և բարձրորակ մասնա­գետների պատրաստ­ման ու որա­կավորման բարձրացման հիմնական օղակը բուհն է, որը տնտեսությանն ապա­հովում է բարձ­րակարգ մասնագետ կադրերով:

Անդրադառնալով ՀՀ արտահանման հնարավորությունների ընդլայնմանը՝ բանախոսը արդիա­կան և բավականաչափ իրատեսական համարեց բարձրագույն կրթության և դրան հարակից ճյուղերի զարգացումը և դրա հիման վրա տեղեկատվական հեռահաղորդակցման տեխնոլոգիաների զարգացումը, բարձր տեխնոլոգիական և գիտատար ապրանքնե­րի արտադրությունը և դրանց արտահանումը, քանի որ նման ապրանքների արտա­հանումը էականորեն չի տուժում ճգնաժամային իրավիճակնե­րում, ինչպես դա տեղի է ունենում հումքային ապրանքների արտահանումից կախված լինելու դեպքում:

 ՀՊՏՀ Լրատվության և հասարակայնության հետ կապերի բաժին