Դեկանը շնորհակալագրեր հանձնեց՝ հասարակական ակտիվության համար

Դիտումների քանակ՝ 885

Հաշվապահական հաշվառման և աուդիտի ֆակուլտետում այսօր առանձնահատուկ խանդավառություն էր. ֆակուլտետի լավագույն ուսանողներին համախմբել էր  դեկան Աշոտ Մաթևոսյանը:  Դեկանը շնորհակալագրերով պարգևատրեց 2014-2015 ուստարում հասարակական ակտիվություն և ուսանողական խորհրդի գործունեությանը ակտիվ մասնակցություն ցուցաբերած ուսանողներին:

Ողջույնի խոսքում Աշոտ Մաթևոսյանը շնորհակալություն հայտնեց այն ուսանողներին, ովքեր  միջբուհական, հանրապետական և  ներբուհական խաղերում իրենց հաջող մասնակցությամբ  բարձր են պահել ֆակուլտետի անունը, աջակցել են  ուսումնական գործընթացի կազմակերպմանը, հանդես են եկել օգտակար նախաձեռնություններով, առհասարակ, ցուցաբերել են հասարակական ակտիվություն: Շնորհակալագրերը հանձնեցին նաև փոխդեկան Սոնա Ղազարյանը, կառավարչական հաշվառման ամբիոնի վարիչ Լիանա Գրիգորյանը, դասախոս  Տիգրան Մանուկյանը:

Մեզ հետ զրույցում Աշոտ Մաթևոսյանն ասաց, որ ամեն ուսումնական տարվա ավարտին շնորհակալագրերի հանձնումը դառնում է հաճելի ավանդույթ, և դա ուսանողին իսկապես խրախուսում է:«Շնորհակալագիրը ուսանողների նվիրված աշխատանքը (թե' ուսմանը,թե' հասարակական կյանքին) գնահատելու, խրախուսելու ամենափոքր ձևն է:Վերջերս, «Ուսանողական գարուն-2015» փառատոնին, մեծ հուզում ապրեցի՝ տեսնելով մեր ուսանողների տաղանդը: Ուսանողները, ներգրավվելով ընդունող հանձնաժողովի ուսանողական շտաբում, մեծապես աջակցել են նաև ընդունելության գործընթացի կազմակերպմանը: Մեծ ուրախություն և հպարտություն է, որ ունենք ուսումնատենչ, ակտիվ, նախաձեռնող, աշխատասեր, շնորհալի ուսանողներ»:

Դեկանը կոչ արեց իր ֆակուլտետի ուսանողներին ակտիվությունը շարունակել նաև գալիք ուսումնական տարում և հույս հայտնեց՝ ձևավորված ջերմ ընտանիքում կներգրավեն  նաև առաջին կուրսեցիներին:

ՀՊՏՀ Լրատվության և հասարակայնության հետ կապերի բաժին