Մագիստրոսական թեզեր էին պաշտպանում կրթության կառավարում մասնագիտացման մագիստրոսները. ներկա էր միջազգային փորձագիտական խումբ

Դիտումների քանակ՝ 999

ՀՊՏՀ միջազգային ծրագրերի կենտրոնում այսօր  մագիստրոսական թեզեր էին պաշտպանում ՀՊՏՀ կրթության կառավարում մասնագիտացման 10 մագիստրոսներ: Պաշտպանությանը ներկա էր միջազգային փորձագիտական խումբ (Հայաստան, Վրաստան, Մեծ Բրիտանիա), որն իրականացնում է արտաքին գնահատում: Նշենք, որ սույն մագիստրոսական կրթական ծրագիրն իրականացվում է Տեմպուսի «Մահաթմա» ծրագրի շրջանակներում:

Նշված մասնագիտացման ամփոփիչ ատեստավորման հանձնաժողովի նախագահն է ՀՀ կրթության և գիտության նախարարության մասնագիտական կրթության կազմակերպման և համակարգման բաժնի պետ Սասունիկ Մելիքյանը: Փորձագիտական խմբի անդամների հետ  թեզերի պաշտպանությանը ներկա էր Մասնագիտական կրթության որակի ապահովման ազգային կենտրոնի տնօրեն Ռուբեն Թոփչյանը:

ՀՊՏՀ լրատվության և հասարակայնության հետ կապերի բաժնի հետ զրույցում մեր բուհի ՅՈՒՆԵՍԿՕ-ի կրթության կառավարման ամբիոնի վարիչ Ներսես Գևորգյանը նշեց. «Մեր համալսարանում առաջին անգամ ուսումնառության վերջնարդյունքների վրա հիմնված մագիստրոսական ծրագիր ենք կառուցել. գիտելիք, հմտություն, կարողություն, ինչը պահանջվում է հիմա: Նոր ծրագիրն արդեն առաջին շրջանավարտներն ունի,  որոնք այսօր ավարտական թեզեր են պաշտպանում»:

Նշենք, որ կրթության կառավարում մասնագիտացման շրջանավարտներ համալսարանը թողարկում է արդեն 4-րդ տարին:

Ամբիոնի ղեկավարի խոսքով՝ միջազգային փորձագիտական խումբը գնահատում է մագիստրոսական փորձնական ծրագրի կառուցումը, իրականացումը, փաստաթղթավորումը և այդ գնահատումը իրականացնում է նաև մագիստրոսական թեզերի պաշտպանությանը ներկա գտնվելով:

ՀՊՏՀ Լրատվության և հասարակայնության հետ կապերի բաժին