Կարիերայի բացահայտումների օր՝ ՀՊՏՀ ուսանողների համար
«Գրանթ Թորնթոն» աուդիտորական ընկերության և «Այ Էյ Բի» բիզնեսի միջազգային ակադեմիայի համատեղ նախաձեռնությամբ այսօր ՀՊՏՀ նիստերի սրահում կայացավ «Կարիերայի բացահայտումների օր» խորագրով սեմինար՝ մեր բուհի ֆինանսներ և վարկ, հաշվապահական հաշվառում և աուդիտ, տնտեսագիտություն և կառավարում բաժինների բակալավրատի և մագիստրատուրայի ուսանողների համար: Հանդիպումը կազմակերպել էր ՀՊՏՀ կարիերայի և մարքեթինգի կենտրոնը:
«Այ Էյ Բի» բիզնեսի միջազգային ակադեմիայի փոխտնօրեն Անի Նահապետյանը, ողջունելով ուսանողներին, ներկայացրեց սեմինարի օրակարգը, առանձնացրեց հիմնական թեմաները, որոնց մասին պետք է խոսվեր: Այսօր ուսանողների հատուկ հյուրն էր «Այ Էյ Բի» բիզնեսի միջազգային ակադեմիայի դասախոս Նելլի Ստեփանյանը, ով կիսվեց կարիերայում հաջողության հասնելու իր գաղտնիքներով: Հաջորդիվ ակադեմիայի միջազգային որակավորումների բաժնի համակարգող Սաթինե Հարությունյանը ներկայացրեց տեղեկություններ «ACCA»-ի (Երդվյալ որակավորված հաշվապահների ասոցիացիա) մասին, նշեց այն ընտրելու շարժառիթները, առավելությունները, խոսեց «ACCA»-ի կրթաթոշակների, դրանց դիմելու մասին:
Վերջում բանախոսները պատասխանեցին ուսանողների հարցերին: Ուսանողները ստացան տեղեկատվական գրքույկներ:
ՀՊՏՀ Լրատվության և հասարակայնության հետ կապերի բաժին