«Էրազմուս Մունդուսը» ՀՊՏՀ-ում ներկայացրեց մագիստրոսական ծրագրերը, կրթաթոշակները
«Եվրոպական կրթական հորիզոններ» ծրագրի շրջանակներում, ՀՊՏՀ ուսանողական խորհրդի և Հայաստանի ուսանողական ազգային ասոցիացիայի հրավերով այսօր մեր համալսարանում էր Հայաստանում «Էրազմուս Մունդուս ուսանողների և շրջանավարտների ասոցիացիայի» ներկայացուցիչ Էդիթ Սողոմոնյանը:
Լրատվության և հասարակայնության հետ կապերի բաժնի հետ զրույցում ասոցիացիայի ներկայացուցիչը տեղեկացրեց, որ իրենց այցելության նպատակն է «Էրազմուս Մունդուսի» հավանական դիմորդներին ներկայացնել մագիստրոսական ծրագրերի փոփոխությունները, դիմումների և քննությունների ընթացակարգերը և պատասխանել ուսանողներին հուզող հարցերին այնքանով, որքանով ներկայիս տեղեկատվությունը թույլ է տալիս:
Նա տեղեկացրեց, որ այդ ծրագրով դիմորդները կարող են կրթություն ստանալ Եվրոպայի տարբեր երկրներում՝ արժանանալով «Էրազմուս Մունդուսի» կրթաթոշակին, որն ապահովում է անվճար կրթության, կեցության հնարավորություն և այդ իսկ պատճառով շատ մրցակցային է:
Ուսանողները բանախոսին ուղղեցին իրենց հետաքրքրող հարցերը:
ՀՊՏՀ Լրատվության և հասարակայնության հետ կապերի բաժին