ՀՊՏՀ-ն՝ անհատույց արյունատվությունների ակտիվ մասնակից
Արյան կամավոր դոնորների միջազգային օրվա կապակցությամբ՝ հունիսի 14-ին, ՀՊՏՀ-ականները՝ պրոֆեսորադասախոսական կազմի ներկայացուցիչներ և խումբ ուսխորհրդականներ՝ նախագահ Սևակ Խաչատրյանի գլխավորությամբ, հանդիսավոր պայմաններում ստացել են շնորհակալագիր: Շնորհակալագիրը տրվել է Հայաստանի պետական տնտեսագիտական համալսարանին ՀՀ առողջապահության նախարարության անունից, Յոլյանի անվան արյունաբանական կենտրոնի տնօրեն, դոկտոր, պրոֆեսոր Սմբատ Դաղբաշյանի կողմից ՝ անհատույց արյունատվություններին ակտիվ մասնակցության համար:
Արյունաբանական կենտրոնի տնօրենը հատուկ շեշտել է ՀՊՏՀ-ի անունը՝ արպես արյունատվական ակցիաների ակտիվ մասնակից:
ՀՊՏՀ լրատվության և հասարակայնության հետ կապերի բաժնի հետ զրույցում դոնորների միջազգային օրվան նվիրված միջոցառման մասնակից Միքայել Թավադյանը նշեց, որ նմանատիպ ակցիաներին մասնակցությունը շատ կարևոր է, հատկապես այն տեսանկյունից, որ դա կարող է փրկել բազմաթիվ կյանքեր:
«Ինքս էլ տարբեր ժամանակներում մասնակցել եմ արյունատվական ակցիաների: Հաճելի է, երբ գիտակցում ես, որ այդպիսով կարողանում ես օգտակար, մարդասիրական գործ անել և կյանք փրկել»,-ասաց դեկանը:
ՈւԽ նախագահ Սևակ Խաչատրյանը մեզ հետ զրույցում նշեց, որ արյունատվության ակցիաներին մասնակցությունը մեծ մարդասիրական քայլ է, այն շարունակական է լինելու. ՀՊՏՀ-ն միշտ իր օգնությունն է ցուցաբերելու այն մարդկանց, ովքեր արյան կարիք ունեն:
ՀՊՏՀ-ականները բազմիցս կամավոր մասնակցել են արյունատվական ակցիաների:
Հ.Գ. Լուսանկարը՝ ՀՊՏՀ ՈՒԽ-ից:
ՀՊՏՀ Լրատվության և հասարակայնության հետ կապերի բաժին