ՀՊՏՀ դասախոսը ՀՀ Նախագահի կողմից արժանացել է ֆիզիկական կուլտուրայի և սպորտի վաստակավոր գործչի պատվավոր կոչման
Հանրապետության տոնի առթիվ երեկ՝ մայիսի 28-ին, ՀՀ Նախագահ Սերժ Սարգսյանի հրամանագրով պետական պարգևներ և կոչումներ են շնորհվել գիտության, կրթության, տնտեսության, առողջապահության, մշակույթի ոլորտների, արվեստի ու սպորտի բնագավառների, Սփյուռքի մի շարք ներկայացուցիչների, ինչպես նաև Հայոց բանակի մի խումբ զինծառայողների: ՀՊՏՀ ֆիզդաստիարակության, ԱԻ և քաղպաշտպանության ամբիոնի դասախոս, մանկավարժական գիտությունների թեկնածու, պրոֆեսոր Լյովա Սամվելյանն արժանացել է ՀՀ ֆիզիկական կուլտուրայի և սպորտի վաստակավոր գործչի պատվավոր կոչման՝ ֆիզկուլտուրայի և սպորտի բնագավառում մեծագույն ավանդի և ներդրման համար: Մեր դասախոսը պարգևատրվել է ոսկե մեդալով և շնորհագրով:
Արժևորելով մրցանակը՝ Լյովա Սամվելյանը ՀՊՏՀ լրատվության և հասարակայնության հետ կապերի բաժնի հետ զրույցում նշեց, որ սա երկար տարիների քրտնաջան և նվիրված աշխատանքի գնահատականն է:
«Իմ երկարամյա գործունեության ընթացքում ձգտել եմ հնարավորինս նպաստել ֆիզիկական կուլտուրայի և սպորտի զարգացմանը, մասսայականացմանը, առողջ ապրելակերպի քարոզմանը, երիտասարդության առողջության բարելավմանը: ՀՊՏՀ հիմնադրման օրվանից աշխատում եմ այս բուհում (38 տարի), որն ինձ համար հարազատ օջախ է»,-ընդգծեց ֆիզիկական կուլտուրայի և սպորտի վաստակավոր գործիչը:
Լյովա Սամվելյանը երկար տարիներ ղեկավարել է ՀՊՏՀ ֆիզդաստիարակության ամբիոնը, նպաստել է ՀՀ-ում մարզաբազաների ստեղծմանը, Դիլիջանի «Տնտեսագետ» մարզաառողջարանի հիմնադիրներից է, 120-ից ավելի գիտահետազոտական աշխատանքների հեղինակ է, բազմիցս հանդես է եկել ինչպես հանրապետական, այնպես էլ միջազգային գիտաժողովներում, ֆիզդաստիարակության և սպորտի համընդհանուր ծրագրի հեղինակն է, միջազգային կարգի սպորտի վարպետ է, արժանացել է մի շարք պարգևների, …երկար կարելի է թվարկել այս շարքը:
Շնորհավորում ենք Լյովա Սամվելյանին բարձր գնահատականի արժանանալու համար, մաղթում քաջառողջություն, ուժ ու եռանդ:
ՀՊՏՀ Լրատվության և հասարակայնության հետ կապերի բաժին