Աջակցություն դպրոցականների ընտանիքներին
ՀՊՏՀ ներկայացուցիչները բուհի կողմից իրականացվող բարեգործական նախաձեռնության շրջանակներում հերթական օգնությունն են ցուցաբերել հայ ընտանիքներին. օտար լեզուների ամբիոնի դասախոս Լուսինե Կարագուլյանը և մի խումբ ուսանողներ մայիսի 27-ին այցելել են Էջմիածնում բնակվող սոցիալապես անապահով 3 դպրոցականների ընտանիքների: Համալսարանականները սնունդ և հագուստ են տրամադրել նրանց:
Ինչպես լրատվության և հասարակայնության հետ կապերի բաժնին հայտնեց Լուսինե Կարագուլյանը, ակցիան իրականություն է դարձել բուհի արհկոմիտեի ֆինանսական, ինչպես նաև դասախոսների և ուսանողների նյութական աջակցության շնորհիվ:
«Մեր նպատակն է որոշակիորեն մեղմել սոցիալապես ծանր դրության մեջ գտնվող հատկապես դպրոցականների ընտանիքների հոգսը: Նախապես խոսել ենք տվյալ դպրոցի տնօրենի հետ, ով մեզ ուղղորդել է դեպի նշված 3 ընտանիքները: Այս ուսումնական տարում նախատեսվում է նմանօրինակ ևս մեկ այց»,- ընդգծեց նախաձեռնության անդամ Լուսինե Կարագուլյանը:
ՀՊՏՀ Լրատվության և հասարակայնության հետ կապերի բաժին