Երևանի թիվ 105 ավագ դպրոցի աշակերտներն այցելել են ՀՊՏՀ

Դիտումների քանակ՝ 1082

Հայաստանի պետական տնետեսագիտական համալսարանի ինֆորմատիկայի և վիճակագրության ֆակուլտետն  այսօր հյուրընկալել է մայրաքաղաքի  թիվ 105 ավագ դպրոցի  աշակերտներին: Ճանաչողական այցելությունը կայացել է բուհի և դպրոցի միջև առկա համագործակցության շրջանակներում (ՀՊՏՀ-ն համագործակցում է մի քանի դպրոցների հետ): Նշված ֆակուլտետի դեկանի պաշտոնակատար Մանուկ Մովսիսյանը, դեկանի տեղակալ Փիրուզա Մայիլյանը,  տնտեսական ինֆորմատիկայի և տեղեկատվական համակարգերի ամբիոնի վարիչ Վարդան Սարգսյանը, տնտեսամաթեմատիկական մեթոդների ամբիոնի դասախոս Ելենա Մանուկյանը , ինչպես նաև մի խումբ ուսանողներ ավագ դասարանների  աշակերտներին ներկայացրել են ֆակուլտետը, նրանց հետ շրջել լսարաններով, ծանոթացրել մասնագիտություններին, դասապրոցեսին, ընդունելության հետ կապված մանրամասներին:

ՀՊՏՀ լրատվության և հասարակայնության հետ կապերի բաժինը զրուցեց ինֆորմատիկայի և վիճակագրության ֆակուլտետի դեկանի տեղակալ Փիրուզա Մայիլյանի հետ, ով նշեց, որ աշակերտներն այցից տպավորված էին: «Աշակերտները մեր բուհից  հեռացան՝ նշելով, որ արդեն իսկ ընտրել են ՀՊՏՀ-ն՝ ուսումը շարունակելու համար. մեր ներկայացուցիչները պատասխանեցին նրանց հուզող հարցերին»,-նշեց դեկանի տեղակալը:

ՀՊՏՀ-ի և ավագ դպրոցների համագործակցության ծրագրի ղեկավար, օտար լեզուների ամբիոնի դասախոս Լուսինե Կարագուլյանը մեզ հետ զրույցում նշեց, որ այս այցերը շարունակական են, առաջիկայում մեր բուհը կհյուրընկալի աշակերտների այլ խմբերի: Ծրագրի ղեկավարը նշեց նաև, որ ՀՊՏՀ ներկայացուցիչներն ակտիվորեն աշխատում են համագործակցության շրջանակներում և օգնում են  ապագա ուսանողներին՝  մասնագիտության ընտրության  հետ կապված գործում:

ՀՊՏՀ Լրատվության և հասարակայնության հետ կապերի բաժին