Ուսանող-գործատու հանդիպում ՀՊՏՀ-ում
Տնտեսագիտական համալսարանի նիստերի սրահում այսօր տեղի ունեցավ հանդիպում՝ մարքեթինգ մասնագիտության բարձր կուրսերի ուսանողների և «Ռիչ Էլեկտրոնիքս» ընկերության ներկայացուցիչների հետ:
Նշենք, որ ՀՊՏՀ մարքեթինգ մասնագիտության ուսանողների հետ հանդիպումը համատեղ կազմակերպել էին «Ռիչ Էլեկտրոնիքս» ընկերությունը և ՀՊՏՀ կարիերայի և մարքեթինգի կենտրոնը: Հանդիպման նպատակն էր նշված ընկերության մարքեթինգի թիմը համալրելու համար համապատասխան կադրեր ընտրելը:
Վերոնշյալ ընկերության ներկայացուցիչներն ուսանողներին ներկայացրեցին իրենց գործունեությունը և ընկերության մարքեթինգի բաժնի համալրման հետ կապված մանրամասները:
Ինչպես տեղեկացրեց ընկերության ներկայացուցիչը՝ իրենց ընկերությունը կարևորում է կոլեկտիվ աշխատանքը և համերաշխ թիմ ունենալու հանգամանքը: Հիմնավորելով հանդիպման նպատակը՝ վերջինս նշեց, որ իրենք փնտրում են խելացի, ստեղծագործ, յուրօրինակ միտք ու թարմ գաղափարներ ունեցող, թիմում աշխատելու կարողությամբ երիտասարդ մարքեթոլոգների:
Ուսանողները հանդես եկան իրենց հարցերով և առաջարկություններով: Նրանք լրացրեցին նաև հարցաթերթիկներ՝ նշելով իրենց անձնական տվյալները (էլ. հասցե, հեռախոսահամար և այլն): Ավարտական կուրսերի ուսանողներն իրենց խոսքում ընդգծեցին, որ կարևորում են առանց աշխատանքային փորձի աշխատանքի անցնելու հնարավորությունը, որն իրենց ընձեռում է ընկերությունը: Գործատուն, ամփոփելով հանդիպումը, նշեց, որ հետադարձ կապի միջոցով ուսանողներին կտեղեկացնի հետագա համագործակցության մասին:
ՀՊՏՀ Լրատվության և հասարակայնության հետ կապերի բաժին