ՀՊՏՀ ներկայացուցիչները վերադարձել են Մալայզիայից. մեր գիտնականի զեկույցը համարվել է լավագույնը

ՀՊՏՀ ներկայացուցիչները՝ գիտության բաժնի պետ, տ.գ.թ., դոցենտ Խորեն Մխիթարյանը, «Ամբերդ» հետազոտական կենտրոնի «Ազգային անվտանգության հետազոտություններ» ծրագրի տնօրեն, տ.գ. թ. Վարդան Աթոյանը, արտաքին կապերի բաժնի գլխավոր մասնագետ, տ.գ.թ. Աղավնի Հակոբյանը և հաշվապահական հաշվառման բաժնի պետ, գլխավոր հաշվապահ  Անուշ Մարգարյանը  վերադարձել են Մալայզիայի մայրաքաղաք Կուալա Լումպուրում կայացած կրթության, տնտեսագիտության և սոցիալական գիտությունների միջազգային նստաշրջանից: Մեր բուհի աշխատակիցները վերադարձել են տպավորված, նստաշրջանին մասնակցությունը բավականին արդյունավետ են համարում:

ՀՊՏՀ ներկայացուցիչներից  Խորեն Մխիթարյանը հանդես է եկել «Բանկային համակարգի իրացվելիության կառավարման  արդի հիմնախնդիրները (ՀՀ նյութերով)» զեկուցմամբ, Վարդան Աթոյանը՝ «Ազգային անվտանգության ապահովման գլխավոր հիմնախնդիրները գլոբալիզացիայի պայմաններում», Աղավնի Հակոբյանը՝  «Արդյունաբերական քաղաքականության արդի գերակայությունները ՀՀ-ում» Անուշ Մարգարյանը՝ «ՀՀ աուդիտորական կազմակերպությունների գործունեության արդյունավետության հիմնական չափանիշները ժամանակակից պայմաններում», թեմաներով զեկուցումներով:

Գիտության բաժնի պետ Խորեն Մխիթարյանը լրատվության և հասարակայնության հետ կապերի բաժնին տեղեկացրեց, որ  նստաշրջանի ընթացքում հնչել են մի շարք հետաքրքիր զեկուցումներ, եղել են օգտակար շփումներ: «Ընդհանուր առմամբ, հնչեցին 15 զեկուցումներ՝ ընդհանուր տնտեսագիտության ոլորտին առնչվող: Քանի որ ինքս գիտական կենտրոնի խմբագրական խորհրդի անդամ եմ, կամզկոմիտեի հետ բաժանմունքներում վերանայեցինք գիտական հոդվածներ ներկայացնելու պահանջները՝ մշակելով նոր չափանիշներ, որոնք կնպաստեն ներկայացվելիք հոդվածների արդյունավետության բարձրացմանը»,- ասաց գիտության բաժնի պետը:

Միջազգային նստաշրջանի մասնակիցների զեկուցումները տպագրվել են ժողովածուում: Նշենք, որ ՀՊՏՀ-ն ներկայացնող Խորեն Մխիթարյանն արժանացել է հավաստագրերի՝ լավագույն զեկույցի և նիստերը վարելու, շնորհանդեսների անցկացմանն աջակցելու  համար:

«Մասնակցությունը մեզ հնարավորություն տվեց սերտացնելու համագործակցությունը  մի շարք երկրների պրոֆեսորադասախոսական կազմի ներկայացուցիչների  հետ, փորձի փոխանակում կատարել՝ ընդօրինակելով լավագույնը»,- հավելեց Խորեն Մխիթարյանը:

Վերջինիս փոխանցմամբ՝ գիտաժողովի մասնակիցների ընտրությունը  կատարվել էր՝  ըստ նրանց ներկայացրած զեկուցումների ընտրության: Նախքան նստաշրջանը կազմկոմիտեին  ուղարկված  և  հավանության  արժանացած  զեկուցումների  հեղինակները  հրավիրվել են  մասնակցելու նստաշրջանին:

ՀՊՏՀ Լրատվության և հասարակայնության հետ կապերի բաժին