ՀՊՏՀ ուսանողները՝ միջազգային ֆոտոմրցույթի առաջատար մասնակիցներ

ՀՊՏՀ կառավարման ֆակուլտետի ուսանողներ Արման Հարությունյանն  ու Մերի Հայրապետյանը մասնակցում են  Արևելյան գործընկերության  «Photoman - 2013»  միջազգային լուսանկարչական մրցույթին, որն անցկացվում է  Facebook  սոցիալական ցանցում` ինտերնետ-ռեալիթի շոու ձևաչափով: Ֆոտոմրցույթին մասնակցում են Վրաստանի, Ուկրաինայի, Մոլդովայի, Բելառուսի, Հայաստանի և Ադրբեջանի սիրողական լուսանկարիչները:

Ինչպես տեղեկանում ենք Հայաստանի լուսանկարիչների ազգային ասոցիացիայի պաշտոնական կայքից,  «Photoman - 2013»-ը միջազգային լուսանկարչական մրցույթ է` սկսնակ և փորձառու ֆոտոսիրողների համար, այն կոչված է աջակցելու Արևելյան գործընկերության երկրների երիտասարդ լուսանկարիչներին: «Photoman - 2013» մրցույթի հիմնական կազմակերպիչը, ինչպես նաև  մրցույթի գաղափարի հեղինակն է Վրաստանի լուսանկարիչների ասոցիացիան (ՎԼԱ): ՎԼԱ-ի հովանու ներքո «Photoman» մրցույթն արդեն երեք անգամ անց է կացվել Վրաստանում և մինչ օրս Վրաստանի ֆոտոհասարակության շրջանում համարվում է ճանաչված և հաջողված: 2013 թվականին «Photoman» մրցույթը դարձել է միջազգային և իրականացվում է Եվրամիության` «ՈՒշադրություն` ժպիտ» («SAY CHEESE!») նախագծի շրջանակներում` Արևելյան գործընկերության երկրներում (Վրաստան, Հայաստան, Ադրբեջան, Բելառուս, Մոլդովա, Ուկրաինա):

Մրցույթի նպատակն է ՝ սեղմ ժամկետներում հնարավորություն տալ լուսանկարչին կոնկրետ թեմայի շրջանակներում ինքնատիպ լուսանկար անել:  Կազմակերպիչների համոզմամբ՝ հենց այսպես է պարզ դառնում լուսանկարչի վարպետությունը` ունակությունները, ճարպկությունը, սրամտությունը և պրոֆեսիոնալ հմտությունները:

Նշենք, որ մրցույթը բաղկացած է 4 փուլերից, 3 փուլերն  արդեն ավարտվել են, 4-րդը մեկնարկել է այսօր, կավարտվի հունվարի 20-ին: Արդյունքները կամփոփվեն հունվար ամսին:

Մեր ուսանողներն այս մրցույթում գրանցել են մեծ հաջողություններ. Արման Հարությունյանը 3 փուլերում առցանց քվեարկության արդյունքում գրավել է  1-ին հորիզոնականը, իսկ Մերի Հայրապետյանի լուսանկարները լավագույն տասնյակում են:

ՀՊՏՀ լրատվության և հասարակայնության հետ կապերի բաժնի հետ զրույցում մեր ուսանող-մասնակիցները նշեցին, որ լուսանկարչությունն իրենց համար հոբբի է, սիրում են ստեղծագործել ֆոտոխցիկի միջոցով:  Մրցույթի առաջատար Արման Հարությունյանը նշեց, որ հաղթանակի մեծ հույս ուն ու հավելեց, որ պատրաստվում է լուսանկարել վերջին՝4-րդ փուլի  լուսանկարը: Ուսանողների խոսքերով՝մրցույթում  իրենց մեծապես աջակցում են ՀՊՏՀ-ականների քվեարկությունները:

Հիշեցնենք, որ հաղթողները  կպարգևատրվեն արժեքավոր մրցանակներով, իսկ լավագույն լուսանկարի հեղինակը կարժանանա   գրան պրի մրցանակի` 24-105 մմ օբյեկտիվով Canon 6D ֆոտոխցիկի:

Թե ինչպես կարող եք քվեարկել մեր մասնակիցների օգտին և ինչ հղումով՝ կարող եք տեղեկանալ ֆեյսբուքյան ֆակուլտետային  ուսանողական խմբերից:

Լրատվության և հասարակայնության հետ կապերի բաժինը հետևում է մեր ուսանողների մասնակցությանը՝ հուսալով, որ առաջիկայում մրցույթի արդյունքներին անդրադառնալու ուրախալի առիթ կունենանք:

Մեր ուսանողներին մաղթում ենք հաջողություն:

Հ.Գ. Մրցույթին տարբեր թեմաներով մեր ուսանողների  մի քանի լուսանկար տրամադրել են հենց իրենք՝ մասնակիցները:

ՀՊՏՀ Լրատվության և հասարակայնության հետ կապերի բաժին