ՀՊՏՀ-ում քննաշրջան է. շրջայց ֆակուլտետներով

Համալսարանի  լսարաններում և միջանցքներում խումբ-խումբ ուսանողներ դասախոսություններ են կրկնում, միմյանց հարցեր տալիս՝  քննասենյակ մտնելուց առաջ սովորածը վերհիշելու և բարձր գնահատական ստանալու համար:

Հայաստանի պետական տնտեսագիտական համալսարանում հունվարի 8-ից մեկնարկել է 2013-2014 ուստարվա առաջին կիսամյակի քննաշրջանը:

ՀՊՏՀ լրատվության և հասարակայնության հետ կապերի բաժինն այսօր շրջայց կատարեց բուհի մի քանի ֆակուլտետներով՝ պարզելու ուսանողների  քննական տրամադրությունը:

Հաշվապահական հաշվառման և աուդիտի ֆակուլտետի ուսանողներից շատերը նշեցին, որ 1-ին քննությանը  ներկայանալը  ավելի  պատասխանատու  է. հատկապես ամանորյա տոներից հետո  դժվար է հավուր պատշաճի  քննության գալ, բայց, այնուամենայնիվ, հաղթահարել են այդ  «խնդիրը»:

«Քննություններին միշտ պետք է պատրաստ ներկայանալ, ճիշտ է՝ հուզմունքը փոքր-ինչ խանգարում է, բայց ներքին ինքնավստահությունը, լավ պատրաստվածությունը առաջնային են: Ուսանողի հոգեբանություն է՝ ինչքան շատ ես կրկնում, այնքան քեզ թվում է՝ լավ չգիտես, սակայն քննության ընթացքում հեշտ է սովորածը վերարտադրել: Ակնկալում եմ բարձր գնահատական»,- ասաց հաշվապահական հաշվառման և աուդիտի ֆակուլտետի 2-րդ կուրսի ուսանողուհի  Միլենա Սանամյանը, ով այսօր քննության էր «Փիլիսոփայություն» առարկայից:

Նույն ֆակուլտետի 3-րդ կուրսի ուսանողուհի Արաքսյա Ենգիբարյանը, ով քննության էր «Ֆինանսական հաշվառումը կորպորատիվ կազմակերպություններում» առարկայից,  նշեց, որ բանավոր քննությունն ավելի է նախընտրում, քանի որ այն օգնում է իրեն ավելի արագ կենտրոնանալ: Արաքսյան նշեց, որ դասախոսների վերաբերմունքը բանավոր քննություններին շատ դրական է և չի կաշկանդում ուսանողին:

Ֆինանսական ֆակուլտետի քննության եկած ուսանողները բարձր տրամադրությամբ  վստահեցրին, որ քննությունները գիտելիքներն ամրապնդելու, գիտելիքներ կուտակելու և դրանք ստուգելու լավագույն ձևերից են:

«Այսօր քննության եմ «Կորպորատիվ ֆինանսներ»  առարկայից՝ բանավոր: Նշեմ, որ բանավոր քննությանն ավելի երկար ենք պատրաստվում, որովհետև անհրաժեշտ է բանավոր խոսքի միջոցով անկաշկանդ  շարադրել  սովորածը: Ի դեպ, բանավոր քննությունն, ըստ իս, ավելի արդյունավետ  է, քանի որ  նախապատրաստում է պետական քննությանը»,- նշեց ֆինանսական ֆակուլտետի 3-րդ կուրսի ուսանող Տիգրան Հախումյանցը:

Մարքեթինգի և բիզնեսի կազմակերպման ֆակուլտետի 4-րդ կուրսի  ուսանողուհի Սոնա Սոնյանը պնդեց, որ ոչինչ չի  կարող խանգարել բարձր գնահատական ստանալուն, եթե  ուսանողը լավ է  պատրաստվել քննությանը, թեև հատկապես 1-ին քննության ժամանակ որոշակի լարվածություն կա: Ուսանողի տպավորությամբ՝ մեր բուհում գիտելիքը միշտ էլ գնահատվում է ըստ արժանվույն:

Կառավարման ֆակուլտետի 2-րդ կուրսի ուսանողուհի Տաթև Սենոքյանը, ով արդեն դուրս էր եկել քննասենյակից, նշեց, որ բարձր գնահատական է ստացել, գոհ  է իր պատասխանից:

Հիշեցնենք, որ մեր բուհում քննաշրջանը կշարունակվի մինչև հունվարի 30-ը: Քննական եռուզեռը մեր դիտակետում է, դրան  կանդրադառնանք նաև առաջիկայում:

Բոլոր ուսանողներին մաղթում ենք հաջող քննություններ:

ՀՊՏՀ Լրատվության և հասարակայնության հետ կապերի բաժին