ՀՊՏՀ-ն խրախուսում է նաև լավ սովորող անապահով աշակերտներին. այց դպրոցներ

Դիտումների քանակ՝ 710

ՀՊՏՀ  մի  քանի  աշխատակիցներ և ուսանողներ  դեկտեմբերի 20-ին այցելել են  Էջմիածին՝  Ամանորին ընդառաջ աջակցություն ցուցաբերելու լավ սովորող դպրոցականների ընտանիքներին: Ակցիային նյութական աջակցություն են ցուցաբերել բուհի ռեկտոր Կորյուն Աթոյանը, վարչատնտեսական աշխատանքների գծով պրոռեկտոր Միխայիլ Կարապետյանը, բուհի մի շարք աշխատակիցներ, ուսանողներ:

Ինչպես նշեց նախաձեռնության հեղինակ,  օտար լեզուների ամբիոնի դասախոս Լուսինե Կարագուլյանը, դպրոցականների ընտանիքներին նմանատիպ  նյութական աջակցություն ցույց տալը նպատակ ունի խրախուսել լավ սովորողներին:

«Երբ Էջմիածնի շրջանի 3 դպրոցների տնօրեններից և ուսմասվարներից տեղեկացա, որ իրենց դպրոցներում կան լավ սովորող կարիքավոր աշակերտներ, որոշեցի ՀՊՏՀ օժանդակությամբ աջակցել նրանց ընտանիքներին: Բուհի ղեկավարության, աշխատակիցների և իմ ուսանողների ջանքերով  հավաքված ողջ նյութական միջոցները  ես և  ուսանողները  նվիրաբերեցինք աշակերտների ընտանիքներին՝ հյուրընկալվելով նրանց: Անչափ հուզում կար և մեր, և դպրոցականների աչքերում: Հետաքրքիրն այն էր, որ մենք անակնկալ այցելեցինք նրանց: Այս անգամ նյութական օգնություն ենք ցուցաբերել Էջմիածնի շրջանի 3 ընտանիքների: Հարկ է նշել, որ նրանք այն դպրոցների աշակերտներն էին, որոնց հետ բուհը համագործակցում է, և այդ աշակերտները հնարավոր է՝ դառնան մեր ուսանողները»,-նշեց տիկին Կարագուլյանը:

Լուսինե Կարագուլյանի խոսքով՝ ՀՊՏՀ անունից կազմակերպվում են  բարեգործական բազմաբնույթ ակցիաներ՝ աջակցելու մանկատներին, ծերանոցներին. այս ակցիան տարբերվեց նրանով, որ հյուրընկալվեցինք դպրոցականների ընտանիքներին:

«Բանն այն է, որ հատկապես Ամանորին ընդառաջ մանկատներն ու ծերանոցները գտնվում են ուշադրության կենտրոնում, այնտեղ այցելում են մի շարք կազմակերպություններից, ուստի որոշեցինք այս անգամ այցելել դպրոցականներին»,- հավելեց Լ. Կարագուլյանը:

ՀՊՏՀ Լրատվության և հասարակայնության հետ կապերի բաժին