Ավարտվեց «Ուսանողական աշուն-2013» փառատոնը. հայտնի դարձավ ՈւՀԱ հաղթող թիմը
ՀՊՏՀ հանդիսությունների դահլիճում այսօր կայացավ «Ուսանողական աշուն-2013» մարզամշակութային փառատոնի վերջին միջոցառումը, որն ուսխորհրդականները մատուցեցին երգ ու պարի գեղեցիկ ներկայացումներով: Հանդես եկան ուսանողներ բոլոր ֆակուլտետներից՝ ազգային, արտասահմանյան երգերով ու պարերով:
Երեք աշնանային օր՝ նոյեմբերի 27-ին, 28-ին և 29-ին համալսարանական կյանքը հիշարժան դարձրին ՈւՀԱ-ականները, ՀՊՏՀ տաղանդավոր՝ երգող, պարող ուսանողները: Այսօրվա ելույթը ևս հետաքրքրական էր, մշակութային և միաժամանակ՝ խելահեղ. ուսանողների ոգևորությունն անսահման էր:
Միջոցառման ավարտին պատվոգրեր հանձնվեցին փառատոնի հաղթողներին: Այսպիսով, ՈւՀԱ հաղթող ճանաչվեց ինֆորմատիկայի և վիճակագրության ֆակուլտետը: Պարի մրցույթում 1-ին հորիզոնականը զբաղեցրեց ֆինանսական ֆակուլտետը, 2-րդը՝ հաշվապահական հաշվառման և աուդիտի, 3-րդը՝ մարքեթինգի և բիզնեսի կազմակերպման ֆակուլտետը: Երգի մրցույթում 1-ին հորիզոնականը զբաղեցրեց ՏԿ և ՄՏՀ ֆակուլտետը, 2-րդը՝ հաշվապահական հաշվառման և աուդիտի, 3-րդը՝ ինֆորմատիկայի և վիճակագրության ֆակուլտետը: «Լավագույն տեսահոլովակ» անվանակարգին արժանացավ կառավարման, «Լավագույն երաժշտական համար» անվանակարգին` հաշվապահական հաշվառման և աուդիտի ֆակուլտետը: Երկու՝ «Հանդիսատեսի համակրանք» և «Լավագույն հումոր» անվանակարգերում մրցանակ ստացավ ֆինանսական ֆակուլտետը: «Ուսանողական աշուն» մարզամշակութային այս տարվա փառատոնում լավագույն ֆակուլտետ ճանաչվեց հաշվապահական հաշվառման և աուդիտի ֆակուլտետը:
Շնորհավորում ենք ՀՊՏՀ ուսանողական խորհրդին՝ հետաքրքիր մշակութային միջոցառումների կազմակերպման և բոլոր ֆակուլտետներին՝ մրցանակների արժանանալու առիթով:
ՀՊՏՀ Լրատվության և հասարակայնության հետ կապերի բաժին