ՀՊՏՀ-ում հյուրընկալվեց Ռոստովի պետական տնտեսագիտական համալսարանի (ՌԻՆԽ) դոցենտ Ռիմա Զախարովան
Հայաստանի պետական տնտեսագիտական և Ռոստովի պետական տնտեսագիտական համալսարանների (ՌԻՆԽ) միջև կնքված երկկողմ պայմանագրի շրջանակներում Ռուսաստանի Դաշնության զբոսաշրջության ազգային ակադեմիայի անդամ, վերոնշյալ համալսարանի ազգային և համաշխարհային տնտեսագիտության ֆակուլտետի հակաճգնաժամային և կորպորատիվ կառավարման ամբիոնի դոցենտ Ռիմա Մկրտչի Զախարովան այսօր հյուրընկալվեց մեր համալսարանում՝ հանդիպելով ՀՊՏՀ ռեկտոր, տնտեսագիտության դոկտոր, պրոֆեսոր Կորյուն Աթոյանի, գիտության և արտաքին կապերի գծով պրոռեկտոր Գագիկ Վարդանյանի, ապա նաև՝ պրոֆեսորադասախոսական կազմի ներկայացուցիչների և ուսանողների հետ:
«Մեր հարգարժան գործընկերն արմատներով հայ է և սերում է Դավիթ Բեկի հայտնի տոհմից: Նա նաև Ռոստովի մարզի հայկական համայնքի անդամ է և հայտնի է իր հայանպաստ գործունեությամբ»,-բուհի դասախոսների և ուսանողների հետ հանդիպմանը ներկայացնելով հյուրին` ասաց ՀՊՏՀ գիտության և արտաքին կապերի գծով պրոռեկտոր Գագիկ Վարդանյանը և շնորհակալություն հայտնեց Ռիմա Զախարովային հանդիպման համար:
«Անչափ ուրախ եմ ու երջանիկ, որ իմ հայրենիքում եմ և շրջապատված եմ հայրենակիցներով: Իմ ծննդավայրը Սյունիքի մարզի Քաջարան քաղաքն է: Երբ 2 տարեկան էի, ընտանիքով տեղափոխվեցինք Ռոստովի մարզ, սակայն երբեք չմոռացանք մեր հայրենիքը` Հայաստանը և ամեն ինչ արեցինք, որպեսզի օտար ափերում բարձր պահենք հայի պատիվը»,- ողջունելով ներկաներին` ասաց Ռիմա Զախարովան և շնորհակալություն հայտնեց ջերմ հյուրընկալության համար:
Այնուհետև բանախոսը ընդհանուր գծերով ներկայացրեց Ռոստովի մարզը, հայտնի քաղաքները, տեսարժան վայրերը, խոսեց Հայաստանի և Ռոստովի մարզի միջև ստեղծված տնտեսական հարաբերությունների, այստեղ ապրող հայերի և նրանց ծավալած գործունեության մասին, անդրադարձավ զբոսաշրջությանն ու հյուրանոցային բիզնեսին: Ռիմա Զախարովան, ով հյուրընկալության ոլորտի փորձառու մասնագետ է, իր ասելիքն ավելի պատկերավոր դարձնելու համար ներկայացրեց հաղորդվող նյութին առնչվող տեսաֆիլմեր:
Ավարտին բանախոսը սիրով պատասխանեց ներկաների հարցերին:
ՀՊՏՀ Լրատվության և հասարակայնության հետ կապերի բաժին