Պետք է տեր կանգնենք ՀՊՏՀ ձևավորված բրենդին թե’ համալսարանի պատերի ներսում, թե’ դրանից դուրս. զրույց ՀՊՏՀ դեկան Աշոտ Մաթևոսյանի հետ

Գալիք տարին միշտ իր հետ լավատեսություն, նորանոր ակնկալիքներ ու հավատ է բերում, և այն բոլոր նպատակները, ցանկությունները, որոնք չեն իրականացել անցնող տարում, ուզում ենք իրականացած տեսնել նոր տարում: 
Այսօրվանից սկսած` ՀՊՏՀ լրատվության և հասարակայնության հետ կապերի բաժինը կզրուցի ՀՊՏՀ ֆակուլտետների դեկանների հետ` փորձելով պարզել, թե ինչով կցանկանային նշանավորված տեսնել 2013 թվականը իրենց ֆակուլտետների կյանքում և ինչ իրատեսական հիմքեր կան դրանք կյանքի կոչելու համար: 
Առաջին մեր զրուցակիցն է ՀՊՏՀ հաշվապահական հաշվառման և աուդիտի ֆակուլտետի դեկան Աշոտ Մաթևոսյանը:
«Ուսանողները պետք է շարունակեն հետևել ՀՊՏՀ գաղափարախոսությանը, իրականացվող բարեփոխումների գործընթացին, դառնան դրա անմիջական մասնակիցը, որովհետև դրա արդյունքն իրենք են տեսնում և ամեն ինչ արվում է իրենց համար»,-կարևորելով ՀՊՏՀ-ում իրականացվող բարեփոխումների շարունակականությունը նաև 2013 թվականին` ֆակուլտետի դեկանը նշեց, որ բոլորը միահամուռ ուժերով պետք է տեր կանգնեն ՀՊՏՀ ձևավորված բրենդին թե’ համալսարանի պատերի ներսում, թե դրանից դուրս: Վերջինս ցանկացավ, որ եկող տարում բուհի պրոֆեսորադասախոսական կազմի անդամները, աշխատակիցները իրենց արդյունավետ ու նվիրված աշխատանքով անձնական պատասխանատվության օրինակ ցույց տան, որովհետև սպասվում է որակի հավատարմագրման գործընթաց և պետք է կարողանալ հաղթահարել այն: 
«Շատ կուզենայի, որ յուրաքանչյուր ուսանող գիտակցի, որ իր չսովորած ամեն րոպեն հետագայում նյութական ու բարոյական լրացուցիչ ծախսեր է պահանջելու իրենից, ուստի ամենայն լրջությամբ ու պատասխանատվությամբ վերաբերվի ուսումնառությանը, ձեռք բերի առավելագույն գիտելիքներ և դառնա այն մասնագետը, որը կքայլի ժամանակի պահանջներին համահունչ և կլինի միշտ պահանջված»,- իր մաղթանքները հղելով ուսանողներին` ասաց Աշոտ Մաթևոսյանը: Մեր զրույցի ավարտին ֆակուլտետի ղեկավարը նշեց, որ եթե իր վերոնշյալ ցանկությունները տեսնի իրականացած, ապա 2013-ը կլինի հաջողված ու բարեբեր տարի:

ՀՊՏՀ Լրատվության և հասարակության հետ կապերի բաժին