Զբոսաշրջության ոլորտի ապագա մասնագետները` միջոցառման կազմակերպիչներ
ՀՊՏՀ զբոսաշրջության կառավարում մասնագիտության 3-րդ կուրսի ուսանողների նախաձեռնությամբ «Հանդիպումների, կոնֆերանսների և այլ միջոցառումների կազմակերպում» դասընթացի շրջանակում (դասախոս, հակաճգնաժամային և զբոսաշրջության կառավարում ամբիոնի ասիստենտ Հասմիկ Համբարձումյան) այսօր ՀՊՏՀ նիստերի սրահում անցկացվեց արտալսարանային գործնական պարապմունք, որին մասնակցեցին ՀՊՏՀ կառավարման ֆակուլտետի դեկան Միքայել Թավադյանը, հակաճգնաժամային և զբոսաշրջության կառավարման ամբիոնի վարիչ Նելլի Շահնազարյանը, ամբիոնի դասախոսներ, հրավիրված էին նաև ՀՊՏՀ և Խ. Աբովյանի անվան հայկական պետական մանկավարժական, Հայաստանի ազգային ագրարային համալսարաների, ֆիզկական կուլտուրայի հայկական պետական ինստիտուտի ուսանողներ:
Զբոսաշրջության կառավարում մասնագիտության 3-րդ կուրսեցի Անի Մխիթարյանը ներկայացրեց գործնական սեմինար պարապմունքի թեման` «Ուսանողների կարողությունների զարգացում ՄԻԱՎ-ի կանխարգելման ոլորտում» և սեմինարավար-հյուրերին` «Նոր սերունդ» հասարակական մարդասիրական կազմակերպության նախագահ Սերգեյ Գաբրիելյանին, բազմազանության խթանման ծրագրերի պատասխանատու Արման Սահակյանին և համակարգող Լուսինե Ալոյանին: Բանախոսը` Սերգեյ Գաբրիելյանը, հարցերի միջոցով ստուգելով ուսանողների գիտելիքները քննարկվող թեմայի շուրջ, հանգամանորեն ներկայացրեց 21-րդ դարի այս հիվանդության պատմությունը, այս ուղղությամբ կատարվող հետազոտությունները, խոսեց հիվանդության տարածման և կանխարգելման ուղիների մասին: Սերգեյ Գաբրիելյանը պատասխանեց նաև ուսանողների բազմաթիվ հարցերին:
«Ուսանողներին հանձնարարվել է կազմակերպել որևէ միջոցառում, որի ընթացքում կատարվող աշխատանքները հնարավորություն են տալիս ուսանողներին ինքնուրույն հաղթահարելու բոլոր դժվարությունները, ձեռք բերելու գիտելիքներ և դրանք կիրառելու»,- միջոցառման ավարտից հետո լրատվության և հասարակայնության հետ կապերի բաժնի հետ զրույցում ասաց Հասմիկ Համբարձումյանը` կարևորելով ուսանողների ջանքերով կազմակերպվող նմանատիպ միջոցառումները:
ՀՊՏՀ Լրատվության և հասարակայնության հետ կապերի բաժին